ශ්‍රී ලංකා ක්‍රිකට් ආයතනයේ මීළඟ සභාපතිවරයා තෝරාගැනීම සම්බන්ධයෙන් නව පනත් කෙටුම්පතක් මගින් යෝජනා ඉදිරිපත් කර තිබෙනවා. එම කෙටුම්පතට අනුව සභාපතිවරයා වෙනම ඡන්දයකින් තෝරා නොගන්නා අතර, ස්වාධීන අධ්‍යක්ෂවරුන් හත්දෙනා අතරින් මණ්ඩලයේ බහුතර ඡන්දයෙන් සභාපතිවරයා තෝරාගැනීමට නියමිතයි.
ඒ අනුව සභාපති ධුරයට පත්වීමට අපේක්ෂා කරන පුද්ගලයෙකු පළමුව ස්වාධීන අධ්‍යක්ෂවරයෙකු ලෙස සුදුසුකම් ලබා, නාමයෝජනා කමිටුව විසින් නම් කර ක්‍රිකට් ආයතනයේ අධ්‍යක්ෂ මණ්ඩලයට පත් විය යුතුයි.
ස්වාධීන අධ්‍යක්ෂවරුන් අතර වසර 15කට වැඩි පළපුරුද්දක් ඇති වරලත් ගණකාධිකාරීවරයෙකු, වසර 15කට වැඩි නීති වෘත්තීය පළපුරුද්දක් ඇති නීතිඥවරයෙකු, අවම වශයෙන් ජාත්‍යන්තර තරග 15කට ක්‍රීඩා කළ හිටපු ක්‍රිකට් ක්‍රීඩකයෙකු, තොරතුරු තාක්ෂණ වෘත්තිකයෙකු සහ අලෙවිකරණ හෝ ගෝලීය සන්නාම කළමනාකරණ වෘත්තිකයෙකු ඇතුළත් විය හැකියි.
ස්වාධීන අධ්‍යක්ෂවරුන් හත්දෙනාගෙන් අවම වශයෙන් දෙදෙනෙකු කාන්තාවන් විය යුතු බවද පනත් කෙටුම්පතේ සඳහන්. ඔවුන්ගේ ධුර කාලය වසර හතරක් වන අතර, තවත් එක් වාරයක් සඳහා සුදුසුකම් ලැබිය හැකියි.
මේ අතර පාර්ලිමේන්තු මන්ත්‍රීවරුන්, පළාත් සභා හෝ පළාත් පාලන ආයතන සාමාජිකයන්, ශ්‍රී ලංකා ක්‍රිකට් ආයතනයේ සේවකයන්, නාමයෝජනා කමිටු සාමාජිකයන් සහ ශ්‍රී ලාංකික පුරවැසියන් නොවන පුද්ගලයන්ට ස්වාධීන හෝ තේරී පත්වන අධ්‍යක්ෂ ධුර සඳහා ඉදිරිපත් විය නොහැකි බව යෝජනා කර තිබෙනවා.
ඊට අමතරව, ඇතැම් අපරාධ සම්බන්ධයෙන් පසුගිය වසර 10 තුළ වරදකරුවන් වූ පුද්ගලයන්, ශ්‍රී ලංකා ක්‍රිකට් ආයතනයට අදාළ තනතුරකින් විනය හේතු මත ඉවත් කළ පුද්ගලයන්, පසුගිය වසර තුන තුළ වෘත්තීය මාධ්‍යවේදීන් ලෙස කටයුතු කළ පුද්ගලයන් සහ ක්‍රීඩකයන්ගේ ඇතැම් සමීප ඥාතීන්ද නුසුදුස්සන් ලෙස දක්වා තිබෙනවා.
එමෙන්ම පසුගිය වසර තුන තුළ ශ්‍රී ලංකා ක්‍රිකට් ආයතනය විසින් පවත්වන ලද හෝ අනුමත කළ තරගාවලියක තරග නිලධාරියෙකු හෝ පුහුණුකරුවෙකු ලෙස කටයුතු කළ පුද්ගලයන්, ක්‍රීඩක නියෝජිතයන් සහ කළමනාකරුවන්ටද අදාළ ධුර සඳහා ඉදිරිපත් වීමට සීමා පනවා තිබෙනවා.
කෙසේ වෙතත්, මෙය මේ වන විට පනතක් ලෙස සම්මත වී නොමැති අතර, ගැසට් පත්‍රයේ පළ කර ඇති පනත් කෙටුම්පතක් පමණක් බව සඳහන්.
