ශ්රී ලංකා ක්රිකට් ආයතනයේ වත්මන් සභාපති ශම්මි සිල්වා මහතා සිය ධූරයෙන් ඉල්ලා අස්වුවද, ඒ සඳහා එරාන් වික්රමරත්න මහතා වැනි පිටස්තර පුද්ගලයෙකු පත් කිරීමට වත්මන් ක්රිකට් ව්යවස්ථාව අනුව ඉඩක් නොමැති බව වාර්තා වේ. ක්රිකට් ව්යවස්ථාවට අනුව සභාපතිවරයා ඉල්ලා අස්වුවහොත්, විධායක කමිටුවක් කැඳවා දැනට සිටින උප සභාපතිවරුන් වන ජයන්ත ධර්මදාස හෝ රවීන් වික්රමරත්න යන මහත්වරුන් දෙදෙනාගෙන් අයෙකු එම ධූරයට පත් කරගත යුතුව ඇත. කෙසේ වෙතත්, පසුගියදා හිටපු ක්රීඩකයන් පිරිසක් ජනාධිපතිවරයා හමුවී ක්රිකට් පාලනය සඳහා අතුරු කමිටුවක් පත් කරන ලෙස යෝජනා කර ඇති අතර, එහි සභාපති ලෙස එරාන් වික්රමරත්න මහතාගේ නම යෝජනා වී ඇති බව ද පැවසේ.
මෙම තත්ත්වය පිළිබඳව අදහස් දක්වමින් සජබ පාර්ලිමේන්තු මන්ත්රී එස්.එම්. මරික්කාර් මහතා සඳහන් කළේ, ශම්මි සිල්වා මහතා තවමත් ඉල්ලා අස්වී නොමැති බවත් එරාන් වික්රමරත්න මහතාට එවැනි පත්වීමක් ලබා දී නොමැති බවත්ය. මෙය ඇතැම් විට මාධ්ය මගින් පතුරුවන ලද පුවතක් විය හැකි බව ද ඔහු පවසා සිටියේය. ශ්රී ලංකා කණ්ඩායම ලෝක කුසලානයේදී අසාර්ථක වීමත් සමඟ ක්රිකට් පරිපාලනයට එල්ල වන විවේචන පිටුපස ක්රීඩක කළමනාකරුවන් සහ ඇතැම් නිලධාරීන් සිටින බවට ද ක්රිකට් බලධාරීන් අතර මතයක් පවතී. මේ අතර, හිටපු ජනාධිපති රනිල් වික්රමසිංහ මහතාට එරෙහිව පවතින නඩුවක් හේතුවෙන් ශම්මි සිල්වා මහතා එළඹෙන අප්රේල් 29 වැනිදා සිය ධූරයෙන් ඉල්ලා අස්වීමට නියමිත බවට ද රාවයක් පවතී.
