ශ්‍රී ලංකා ගමනාගමන මණ්ඩලය සඳහා විදුලි බස් රථ 200ක් මිලදී ගැනීමට අනුමැතිය ලැබී තිබුණද, ව්‍යාපෘතිය නියමිත පරිදි ක්‍රියාත්මක කිරීමට නොහැකි වී ඇති බව ජාතික විගණන කාර්යාලයේ විශේෂ විගණන වාර්තාවකින් අනාවරණය වී තිබේ.
කොළඹ අගනගර කලාපයේ සහ ගම්පහ දිස්ත්‍රික්කයේ පොදු ප්‍රවාහන සේවයට මෙම බස් රථ යෙදවීමට සැලසුම් කර තිබුණේ ඉන්ධන ආනයනය අඩු කිරීම සහ වායු දූෂණය අවම කිරීමේ අරමුණිනි.
විගණන වාර්තාවට අනුව, ප්‍රසම්පාදන ලේඛන ලංසුකරුවන් දස දෙනෙකු මිලදී ගෙන තිබුණද, ලංසු ඉදිරිපත් කර තිබුණේ එක් අයෙකු පමණි. එම ලංසුකරු ඉදිරිපත් කළ කාර්යසාධන බැඳුම්කරය ව්‍යාජ එකක් බව සඳහන් වීම හේතුවෙන් ඔහු නුසුදුස්සෙකු වී තිබේ. ඒ අනුව 2024 ජූලි 20 වැනිදා ප්‍රසම්පාදන ක්‍රියාවලිය අවසන් කර ඇත.
එහෙත් 2025 ඔක්තෝබර් 27 වන විටත් බස් රථ මිලදී ගැනීම හෝ ඒවා ධාවනයට එක් කිරීම සඳහා අවශ්‍ය ක්‍රියාමාර්ග ගෙන නොතිබූ බව වාර්තාවේ දැක්වේ.
ප්‍රසම්පාදන ක්‍රියාවලියේ දුර්වලතා, ලංසු ඇගයීමේ අඩුපාඩු, විකල්ප සැලසුම් නොමැතිවීම සහ ප්‍රවාහන අමාත්‍යාංශය, මහා භාණ්ඩාගාරය හා ශ්‍රී ලංකා ගමනාගමන මණ්ඩලය අතර සම්බන්ධීකරණයේ දුර්වලතා ව්‍යාපෘතිය ප්‍රමාද වීමට බලපා ඇති බවද විගණනයෙන් පෙන්වා දී තිබේ.
මෙම ප්‍රමාදය හේතුවෙන් ඉන්ධන ආනයනය අඩු කිරීම සහ නාගරික වායු දූෂණය අවම කිරීම වැනි ව්‍යාපෘතියේ අපේක්ෂිත ප්‍රතිලාභ ලබාගැනීමද ප්‍රමාද වී ඇත.
