රටේ සාමය සහ ස්ථාවරත්වය බිඳ දැමීමට උත්සාහ කරන අදෘශ්යමාන බලවේගයන්ගේ මූල්ය ශක්තිය මුලිනුපුටා දැමීම සඳහා ආරක්ෂක අමාත්යාංශය දැන් සෘජු මෙහෙයුමකට අවතීර්ණ වී සිටියි. ත්රස්තවාදී ක්රියාවන්ට හෝ ඒ සඳහා අනුබල දෙන මූල්ය ජාලයන්ට සම්බන්ධ යැයි සැක කරන ඕනෑම පුද්ගලයෙකුගේ හෝ සංවිධානයක බැංකු ගිණුම්, නිශ්චල දේපළ සහ සියලු වත්කම් ක්ෂණිකව අත්හිටුවීමට හැකි වන පරිදි ඉලක්කගත මූල්ය සම්බාධක (Targeted Financial Sanctions) බලාත්මක කර තිබේ. මෙමඟින් අදාළ දේපළ විකිණීම, මාරු කිරීම හෝ භාවිත කිරීම නීතිමය වශයෙන් සහමුලින්ම තහනම් වන අතර, ජාතික ආරක්ෂාවට එල්ල විය හැකි ඕනෑම තර්ජනයක් එහි මූලාරම්භයේදීම මැඩපැවැත්වීම මෙහි මූලික අරමුණයි.
මෙම දැවැන්ත ක්රියාවලිය හුදෙක් දේශීය තීරණයක් පමණක් නොව, එක්සත් ජාතීන්ගේ ආරක්ෂක මණ්ඩලයේ 1373 (2001) යෝජනාවට අනුව ජාත්යන්තර ප්රමිතීන්ට අනුකූලව ක්රියාත්මක වන්නකි. 1968 අංක 45 දරන එක්සත් ජාතීන්ගේ පනත යටතේ විදේශ කටයුතු අමාත්යවරයා වෙත පැවරී ඇති බලතල අනුව මෙම සම්බාධක පනවනු ලබන අතර, එහි සියලු මෙහෙයුම් කටයුතු මෙහෙයවන “නිසි බලධාරියා” ලෙස ආරක්ෂක ලේකම්වරයා පත් කර ඇත. පද්ධතියේ විනිවිදභාවය සහ මහජන දැනුවත්භාවය උදෙසා www.competentauthority.gov.lk
වෙබ් අඩවිය ද නිල වශයෙන් හඳුන්වා දී ඇති අතර, එමඟින් අදාළ තොරතුරු විවෘතව ලබා ගැනීමට ඕනෑම අයෙකුට අවස්ථාව සලසා දී තිබීම විශේෂත්වයකි.
ආරක්ෂක අංශ පෙන්වා දෙන්නේ මෙම නව නීතිමය රාමුව මඟින් මෙරට මූල්ය පද්ධතිය අපරාධකරුවන්ගෙන් ආරක්ෂා කර ගැනීමටත්, ජාත්යන්තර වශයෙන් ශ්රී ලංකාව සතු බැඳීම් අකුරටම ඉටු කිරීමටත් මග පෑදෙන බවයි. මුදල් මත පදනම්ව ගොඩනැගෙන ත්රස්තවාදී සැපයුම් ජාල බිඳ දැමීම තුළින් රටේ සාමාන්ය ජනතාවගේ ආරක්ෂාව උපරිමයෙන් තහවුරු වන බව බලධාරීන් අවධාරණය කරයි. ජාතියේ හෙට දවස වෙනුවෙන් මූල්ය පාරිශුද්ධභාවය සහ දැඩි විනයක් සහිත ආරක්ෂක පිළිවෙතක් අනුගමනය කිරීම ශ්රී ලංකාව ස්ථාවර රාජ්යයක් ලෙස ලෝකය හමුවේ ඔසවා තැබීමට හේතු වනු ඇත.
