අයහපත් කාලගුණික තත්ත්වයන් හේතුවෙන් වී වේලීමට ගොවි ජනතාව මුහුණ දෙන ගැටලු සහ මහා මාර්ග අයිනේ වී වේලීම නිසා සිදුවන අනතුරු අවම කිරීමේ අරමුණින්, නවීන තාක්ෂණික වී වේලන යන්ත්ර 50ක් දිවයින පුරා පිහිටි සමූපකාර සමිති වෙත ප්රදානය කිරීමට රජය තීරණය කර තිබේ.
එක් යන්ත්රයක වටිනාකම රුපියල් මිලියන 10ක් වන අතර, එක් යන්ත්රයකින් දිනකට වී මෙට්රික් ටොන් 10කට ආසන්න ප්රමාණයක් වේලීමේ ධාරිතාවයක් පවතී. මෙම යන්ත්ර ලබා ගැනීමට කැමති සමූපකාර සමිතිවලට නිසි ව්යාපෘති වාර්තාවක් ඉදිරිපත් කිරීම මගින් ඒ සඳහා ඉල්ලුම් කළ හැකිය. මෙම වැඩසටහන හරහා ගොවීන්ට තම අස්වනු සමූපකාර හරහා අලෙවි කර ඉහළ මිලක් ලබා ගැනීමටත්, ඉතා පහසුවෙන් සිය අස්වනු වියලා ගැනීමටත් අවස්ථාව සැලසේ.
මේ අතර වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යාංශය පවසන්නේ, පසුගිය මහ කන්නයේ වාර්තාගත අස්වැන්නක් ලැබී ඇති අතර යල කන්නයේ ද ගොවීන් බහුලව වී වගා කර ඇති බැවින් රට තුළ සහල් හිඟයක් ඇතිවීමට ඉඩක් නොමැති බවයි. එසේම වී අලෙවි මණ්ඩලය සතු ගබඩා වහාම විවෘත කර, සතොස සහ අනෙකුත් රාජ්ය ආයතන ඒකාබද්ධ කරමින් මෙම යල කන්නයේ වී අස්වනු ගොවීන්ගෙන් සාධාරණ මිලකට මිලදී ගැනීමේ කටයුතු කඩිනම් කර ඇති බව ද අමාත්යාංශය වැඩිදුරටත් දැනුම් දෙයි.
