සිංහල සහ හින්දු අලුත් අවුරුදු සමයේ වෙළෙඳසැල් සහ බේකරි වැසී පැවතීම හේතුවෙන් බිත්තර මිලෙහි තාවකාලික පහත වැටීමක් සිදුව ඇති බව බිත්තර නිෂ්පාදකයින්ගේ සංගමයේ භාණ්ඩාගාරික විජය අල්විස් මහතා පවසයි. අප්රේල් 12 සිට 20 දක්වා කාලය තුළ බිත්තර බෙදා හැරීම සහ තොග වෙළෙඳපොළ කටයුතු අඩාල වීම මීට ප්රධාන හේතුව වී තිබේ.
දෛනිකව බිත්තර මිලියන 9ත් 10ත් අතර ප්රමාණයක් නිෂ්පාදනය වන අතර, පසුගිය දින අටක කාලය තුළ බිත්තර මිලියන 80ක පමණ අතිරික්ත තොගයක් ගොවිපළවල් තුළ ගොඩගැසී ඇත. අලුත් අවුරුද්දට පෙර රුපියල් 35-36 අතර පැවති බිත්තරයක මිල අප්රේල් 20 වන විට රුපියල් 31-32 දක්වා පහත වැටුණු අතර, දැනට නිෂ්පාදකයන්ගෙන් බිත්තර මිලදී ගනු ලබන්නේ රුපියල් 28ක පමණ මිලකටය. පාසල් ආරම්භ වීම සහ වෙළෙඳපොළ යථා තත්ත්වයට පත්වීමත් සමඟ ඉදිරි සතිය තුළ බිත්තර සැපයුම ස්ථාවර වනු ඇති අතර ලබන මාසය වන විට මිල උච්චාවචනයන් සමනය වනු ඇතැයි ඒ මහතා වැඩිදුරටත් සඳහන් කළේය.
