ශ්රී ලංකා අපනයන සංවර්ධන මණ්ඩලය (EDB) විසින් සංවිධානය කරනු ලබන මෙරට ප්රමුඛතම ජාත්යන්තර වෙළඳ ප්රදර්ශනය වන “ශ්රී ලංකා එක්ස්පෝ” (Sri Lanka Expo), 2027 වසරේ ජනවාරි 14 සිට 17 දක්වා කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී (BMICH) පැවැත්වීමට තීරණය කර ඇත. ගෝලීය දේශපාලනික අවිනිශ්චිතතාවන් හමුවේ ජාත්යන්තර වෙළඳාමට සහ සංචාරක ක්ෂේත්රයට එල්ල වී ඇති බලපෑම් සැලකිල්ලට ගනිමින්, මුලින් 2026 වසරේ පැවැත්වීමට සැලසුම් කර තිබූ මෙම ප්රදර්ශනය මෙලෙස 2027 වසර දක්වා කල් තබා තිබේ. මෙම දැවැන්ත ප්රදර්ශනය සඳහා දේශීය අපනයනකරුවන් 750ක් පමණ සහ ජාත්යන්තර ගැනුම්කරුවන්, ආයෝජකයින් ඇතුළු නියෝජිතයින් 1,500ක් පමණ සහභාගී වනු ඇතැයි අපේක්ෂා කෙරේ. 2030 වසර වන විට ඇමෙරිකානු ඩොලර් බිලියන 36ක ජාතික අපනයන ඉලක්කයක් සපුරා ගැනීම සඳහා ශ්රී ලංකාව දකුණු ආසියාවේ ප්රමුඛ වෙළඳ සහ ආයෝජන මධ්යස්ථානයක් ලෙස ස්ථාපිත කිරීම මෙහි මූලික අරමුණයි.
ප්රදර්ශනයේදී ප්රධාන අපනයන ක්ෂේත්ර තුනක් යටතේ නිෂ්පාදන සහ සේවා ඉදිරිපත් කෙරෙන අතර කාර්මික අපනයන අංශය යටතේ ඇඟලුම්, මැණික් සහ ස්වර්ණාභරණ, යාත්රා තැනීම, රබර් නිෂ්පාදන, විදුලි සහ ඉලෙක්ට්රොනික උපකරණ සහ ඖෂධ නිෂ්පාදන ප්රදර්ශනය කෙරේ. කෘෂිකාර්මික අපනයන අංශය යටතේ තේ, කුළුබඩු, පොල් ආශ්රිත නිෂ්පාදන, ධීවර නිෂ්පාදන, ආයුර්වේද නිෂ්පාදන මෙන්ම පලතුරු සහ එළවළු ද ඉදිරිපත් කිරීමට නියමිතය. අපනයන සේවා අංශය හරහා තොරතුරු තාක්ෂණය (ICT/BPM), ලොජිස්ටික්ස්, පුනර්ජනනීය බලශක්තිය සහ සුවතා සේවා පිළිබඳව ජාත්යන්තර අවධානය යොමු කෙරේ.
ප්රදර්ශකයන් සඳහා ලියාපදිංචි වීමේ කාලය 2026 ජූලි 31 දක්වා දීර්ඝ කර ඇති අතර, වැඩිදුර තොරතුරු www.srilankaexpo.lk වෙබ් අඩවියෙන් ලබාගත හැකිය. මෙම වැඩසටහනට සමගාමීව ආයෝජක සංසද, ව්යාපාරික හමුවීම් (B2B), විලාසිතා සංදර්ශන සහ සංස්කෘතික ප්රසංග රැසක් ද පැවැත්වීමට සංවිධායකයින් සැලසුම් කර ඇත. ශ්රී ලංකා අලෙවිකරණ ආයතනය (SLIM) සහ ශ්රී ලංකන් ගුවන් සේවය මෙහි උපාය මාර්ගික හවුල්කරුවන් ලෙස කටයුතු කරනු ලබයි.
