ශ්රී ලංකාවෙන් බැහැරට සිදු කෙරෙන අනවසර අරමුදල් මාරු කිරීම් අපරාධ වරදක් ලෙස දැඩි නීති රාමුවට යටත් කිරීමට අදාළව 2017 අංක 12 දරන විදේශ විනිමය පනත සංශෝධනය කිරීමට අමාත්ය මණ්ඩල ප්රතිපත්තිමය අනුමැතිය හිමිව තිබේ.
භාණ්ඩ ආනයනය කිරීමේ අරමුණින් අත්තිකාරම් ලෙස විදෙස් රටවලට මුදල් ප්රේරණය කළද, නිසි කාල සීමාවක් ඇතුළට අදාළ භාණ්ඩ මෙරටට ගෙන්වා ගැනීමට අපොහොසත් වන අවස්ථා අනවසර විදේශ විනිමය මාරු කිරීම් ලෙස සලකනු ලබයි. මීට පෙර පවතින නීතිමය ක්රමවේදය යටතේ මෙවැනි සිදුවීම් සඳහා ශ්රී ලංකා මහ බැංකුව විසින් අදාළ ප්රේරණයේ වටිනාකමට සමාන මූල්ය දඩයක් පැනවීම හැරෙන්නට, ඒවා අපරාධ වැරදි ලෙස අර්ථ දක්වා නොතිබීම නිසා නීතිමය වශයෙන් අපරාධ නඩු පැවරීමේ හැකියාවක් නොතිබිණි.
මෙම නව පනත් සංශෝධනය හරහා අදාළ නීති විරෝධී මූල්ය මෙහෙයුම් අපරාධ වැරදි ලෙස ස්ථාපිත වීමත් සමඟ, විමර්ශන සහ නීතිය ක්රියාත්මක කරන ආයතනවලට වඩාත් ඵලදායී හා දැඩි නීතිමය ක්රියාමාර්ග ගැනීමට මඟ පෑදෙනු ඇති අතර, ජනාධිපතිතුමා විසින් ඉදිරිපත් කළ මෙම යෝජනාව ජාතික ආර්ථිකය සුරක්ෂිත කිරීමේ තීරණාත්මක පියවරක් වනු ඇත.
