පරිපාලනමය ගැටලු රැසක පැටලී සිටින පේරාදෙණිය විශ්වවිද්යාලයේ බලධාරීන් අද දින (අගෝස්තු 19) පෙරවරු 10.00 ට නැවත වරක් පාර්ලිමේන්තු රාජ්ය ව්යාපාර පිළිබඳ කාරක සභාව හමුවේ පෙනී සිටීමට නියමිතය.
පසුගිය අගෝස්තු 05 වන දින පැවැති කෝප් කමිටු සමාලෝචන රැස්වීමේදී විශ්වවිද්යාලයේ වත්මන් කාර්යසාධනය සහ මූල්ය විනය සම්බන්ධයෙන් කෝප් කමිටුව සිය අප්රසාදය පළ කර තිබුණි. ඒ අනුව අද දින පැවැත්වෙන සමාලෝචන රැස්වීම සඳහා පූර්ව සූදානමකින් යුතුව මුහුණ දීමට උපකුලපති ටෙරන්ස් මධුජිත් මහතා ප්රමුඛ පාලනාධිකාරිය පසුගිය දිනවල විශේෂ වෙහෙසක් ගෙන තිබේ.
මෙම රැස්වීමට මුහුණ දීම සඳහා විශ්වවිද්යාලය තුළ අභ්යන්තර සාකච්ඡා කිහිපයක්ම පවත්වා ඇති අතර, එහිදී පසුගිය රැස්වීමේදී සිදුවූ කරුණු දක්වමින් උපකුලපතිවරයා සිය නිලධාරීන් වෙත දෝෂාරෝපණය කර ඇති බවද වාර්තා වේ.
කෙසේ වෙතත්, උපකුලපතිවරයාගේ පරිපාලනමය අසමත්භාවයන් සහ දුර්වලතාවයන් වෙනුවෙන් පෙනී සිටීමට තමන් සූදානම් නැති බවට විශ්වවිද්යාලයේ ඇතැම් ජ්යෙෂ්ඨ නිලධාරීන් අභ්යන්තරව ප්රකාශ කර ඇති බවද විශ්වවිද්යාල ආරංචි මාර්ග සඳහන් කරයි.
