ශ්රී ලංකාව සහ ප්රංශය අතර ද්විපාර්ශ්වික සබඳතා තවදුරටත් ශක්තිමත් කිරීම අරමුණු කරගත් දෙවන දේශපාලන උපදේශන සාකච්ඡා මාලාව පසුගියදා මාර්ගගත ක්රමයට (Online) සාර්ථකව පවත්වා තිබේ.
මෙම සුවිශේෂී සාකච්ඡාව සඳහා ශ්රී ලංකා පාර්ශවයෙන් විදේශ කටයුතු, විදේශ රැකියා හා සංචාරක අමාත්යාංශයේ යුරෝපය සහ උතුරු ඇමරිකා අංශයේ අධ්යක්ෂ ජනරාල් සුගීෂ්වර ගුණරත්න මහතා සහ ප්රංශ පාර්ශවයෙන් එරට විදේශ කටයුතු අමාත්යාංශයේ ආසියා සහ ඕෂනියා අධ්යක්ෂ බෙනොයිට් ගිඩේ මහතා සම-සභාපතිත්වය දරනු ලැබූහ.
මෙහිදී දෙරට අතර පවතින ද්විපාර්ශ්වික දේශපාලන සබඳතා, නාවික සහ ආරක්ෂක සහයෝගිතාව මෙන්ම වෙළඳ, සංචාරක, ආර්ථික සංවර්ධන සහ අධ්යාපන ක්ෂේත්රයන්හි සබඳතා තවදුරටත් පුළුල් කර ගැනීම පිළිබඳව දෙපාර්ශ්වය අතර දීර්ඝ ලෙස අදහස් හුවමාරු විය.
දිට්වා සුළි කුණාටු ව්යසනයෙන් පසු ප්රංශ රජය විසින් ශ්රී ලංකාව වෙත ලබාදුන් කඩිනම් මානුෂීය ආධාර පිළිබඳව ශ්රී ලංකා රජයේ කෘතඥතාව මෙහිදී ප්රංශ නියෝජිතයන් වෙත පිරිනැමුණි. එසේම ශ්රී ලංකාව තුළ ප්රංශ ආයෝජන ඉහළ යාම, ප්රංශ සංචාරකයින්ගේ පැමිණීමේ වර්ධනය සහ අඛණ්ඩව ලැබෙන සංවර්ධන සහයෝගිතාව ද මෙහිදී ඇගයීමට ලක් කෙරිණි.
දෙරටේ සහයෝගිතාවයෙන් යුතුව ‘සමුද්රීය අධ්යයන සඳහා වන คලාපීය මධ්යස්ථානය’ (RCMS) පිහිටුවීමට හැකිවීම ද්විපාර්ශ්වික සබඳතාවල වැදගත් සන්ධිස්ථානයක් ලෙස දෙපාර්ශවයම හඳුනා ගත්හ. මීට අමතරව, ගෝලීය දේශගුණික වෙනස්වීම්වලට මුහුණ දීම සහ තිරසාර සාගර පාලනය (Sustainable Ocean Governance) වෙනුවෙන් එක්ව කටයුතු කළ හැකි ඉදිරි අවස්ථා පිළිබඳව ද මෙහිදී විශේෂ අවධානයක් යොමු විය.
