‘දිට්වා’ සුළි කුණාටුවෙන් පූර්ණ හානි වූ නිවසක් වෙනුවෙන් රජයෙන් අනුමත වූ ආධාර මුදලකින් රුපියල් ලක්ෂ දහයක මුදලක් අල්ලස් ලෙස ඉල්ලා ලබාගැනීමේ චෝදනාව මත මොනරාගල ප්රාදේශීය ලේකම් කාර්යාලයේ ග්රාම නිලධාරීවරයෙකු සහ පැලවත්ත සීනි කර්මාන්තශාලාවේ කම්කරුවෙකු අල්ලස් හෝ දූෂණ චෝදනා විමර්ශන නිලධාරීන් විසින් අත්අඩංගුවට ගෙන තිබේ.
පැමිණිලිකාරියගේ නිවාස හානිය වෙනුවෙන් රජය මඟින් රුපියල් ලක්ෂ 50ක උපරිම ආධාර මුදලක් අනුමත කර තිබුණි. ඒ අනුව 2026 අප්රේල් 10 වන දින එහි පළමු වාරිකය ලෙස රුපියල් ලක්ෂ 20ක මුදලක් ඇයට ලැබී ඇති අතර, සැකකාර ග්රාම නිලධාරියා සහ කම්කරුවා එක්ව ඉන් රුපියල් ලක්ෂ 10ක මුදලක් අල්ලස් ලෙස ලබාගෙන ඇත.
පළමු වාරිකයෙන් ලක්ෂ 10ක් කොල්ලකෑමට අමතරව, ඉදිරියේදී රජයෙන් ලබාදීමට නියමිත දෙවන සහ තෙවන වාරික මුදල් ද කිසිදු බාධාවකින් තොරව නිදහස් කර දීම සඳහා තවත් ලක්ෂ 5 බැගින් (තවත් ලක්ෂ 10ක්) අල්ලස් ලෙස ඉල්ලා ඇති බව විමර්ශනවලදී වැඩිදුරටත් අනාවරණය වී තිබේ.
අත්අඩංගුවට ගත් සැකකරුවන් දෙදෙනා මොනරාගල මහේස්ත්රාත් අධිකරණය වෙත ඉදිරිපත් කිරීමෙන් අනතුරුව, එළැඹෙන මැයි 25 වනදා දක්වා රක්ෂිත බන්ධනාගාරගත කිරීමට මහේස්ත්රාත්වරයා නියෝග කළේය.
