සෞඛ්ය ක්ෂේත්රය තුළ කෘත්රිම බුද්ධිය (AI) භාවිතය නිසි ලෙස නියාමනය කිරීම සඳහා සුදුසු නීතිමය රාමුවක පවතින අවශ්යතාව ශ්රී ලංකාව මැනවින් හඳුනාගෙන ඇති බව සෞඛ්ය අමාත්ය වෛද්ය නලින්ද ජයතිස්ස මහතා පවසයි. ස්විස්ටර්ලන්තයේ ජිනීවා නුවර පැවැත්වෙන ලෝක සෞඛ්ය සංවිධානයේ (WHO) 79 වන ලෝක සෞඛ්ය සමුළුව අමතමින් අමාත්යවරයා මේ බව කියා සිටියේය. මෙරට සෞඛ්ය ක්ෂේත්රය ඩිජිටල්කරණය කිරීමේ පියවරක් ලෙස පුද්ගල දත්ත ආරක්ෂණ පනත හඳුන්වා දෙමින්, දත්ත ආරක්ෂණ අධිකාරියක් පිහිටුවීමට ශ්රී ලංකා රජය මේ වන විටත් අවශ්ය පියවර ගෙන ඇති බව ද හෙතෙම ලෝක නායකයන් හමුවේ සිහිපත් කළේය.
එහිදී වැඩිදුරටත් අදහස් දැක්වූ අමාත්ය වෛද්ය නලින්ද ජයතිස්ස මහතා පෙන්වා දුන්නේ, ගෝලීය වශයෙන් සංවර්ධනය කෙරෙන කෘත්රිම බුද්ධි විසඳුම් නිසි දේශීයකරණයකින් තොරව සෘජුවම භාවිතයට ගැනීම සෞඛ්ය ක්ෂේත්රයේ පවතින අසමානතා තවදුරටත් පුළුල් කිරීමට හේතු විය හැකි බවයි. එම නිසා AI තාක්ෂණය මෙරටට ගැලපෙන සේ යොදා ගැනීමේදී ශ්රී ලංකාවේ රෝග ව්යාප්තිය, සෞඛ්ය සේවා කාර්ය ප්රවාහයන්, භාෂාව සහ සමාජීය යථාර්ථයන්ට ගැළපෙන අයුරින් අනුවර්තනය කිරීම අත්යවශ්ය කරුණක් බව ද අමාත්යවරයා අවධාරණය කළේය. රටවල් රැසක විදේශීය නියෝජිතයන් පිරිසක් එක්ව සිටින මෙම ජාත්යන්තර සමුළුවේදී ලංකාවේ සෞඛ්ය ක්ෂේත්රයේ ඉදිරි දැක්ම පිළිබඳව පැසසුම් හිමි විය.
මේ අතර, “වැඩකරමු – රට හදමු – ගෞරවනීය රාජ්ය සේවාවක් ගොඩනගමු” යන තේමාව යටතේ සමස්ත ලංකා සෞඛ්ය කළමනාකරණ නිලධාරීන්ගේ සංගමයේ පළමු වන වාර්ෂික මහා සමුළුව ද කොළඹදී පැවැත්වුණු අතර, ඒ සඳහා සෞඛ්ය නියෝජ්ය අමාත්ය වෛද්ය හංසක විජේමුනි මහතා ඇතුළු සෞඛ්ය නිලධාරීන් රැසක් සහභාගී වූහ.
