ශ්රී ලංකාව තුළ 1990 වසරේ සිට ක්රමයෙන් ක්රියාත්මක කරන ලද අධික විෂ සහිත කෘමිනාශක තහනම් කිරීමේ ප්රතිපත්තිය හේතුවෙන් රටේ සමස්ත සියදිවි නසාගැනීම් ප්රමාණය සියයට 70 කට ආසන්න ප්රමාණයකින් පහත හෙළීමට හැකි වූ බව සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස මහතා ප්රකාශ කරයි. ස්විස්ටර්ලන්තයේ ජිනීවා නුවර පැවැත්වෙන ලෝක සෞඛ්ය සංවිධානයේ 79 වන ලෝක සෞඛ්ය සමුළුවට සමගාමීව පැවැත්වුණු “කෘමිනාශක භාවිතයෙන් සිදුවන සියදිවි නසාගැනීම් වැළැක්වීම” පිළිබඳ විශේෂ සැසියක් අමතමින් අමාත්යවරයා මේ බව කියා සිටියේය. ශ්රී ලංකාව, ගයානාව, කෙන්යාව, නයිජීරියාව සහ පකිස්ථානය යන රටවල් ඒකාබද්ධව සංවිධානය කරන ලද මෙම විශේෂ සැසිය සඳහා ලෝක සෞඛ්ය සංවිධානය (WHO) සහ එක්සත් ජාතීන්ගේ පරිසර වැඩසටහන (UNEP) ඍජු සහයෝගය ලබා දී තිබේ.
මෙහිදී වැඩිදුරටත් අදහස් දැක්වූ අමාත්යවරයා පෙන්වා දුන්නේ, කෘමිනාශක පාලනය කිරීම යනු ඉතා අඩු පිරිවැයකින් කෙටි කාලයක් තුළ ඉහළම ප්රතිඵල ලබාගත හැකි සාක්ෂි සහිත සාර්ථක ක්රමවේදයක් බවයි. ඒ අනුව ලෝකයේ සෙසු සංවර්ධනය වෙමින් පවතින රටවල් ද තමන්ගේ ජාතික සියදිවි නසාගැනීම් වැළැක්වීමේ උපායමාර්ග සඳහා මෙම කෘමිනාශක සීමා කිරීමේ ප්රතිපත්තිය ඇතුළත් කළ යුතු බවත්, ඒ සඳහා ජාත්යන්තර සංවිධානවල තාක්ෂණික සහ ප්රතිපත්තිමය සහාය අත්යවශ්ය බවත් හෙතෙම සඳහන් කළේය. ශ්රී ලංකාව ලබාගත් මෙම සුවිශේෂී ජයග්රහණය පිළිබඳ අත්දැකීම් ලෝකයේ සෙසු රටවල් සමඟ බෙදා ගැනීමට ලංකාව සැමවිටම සූදානම් බව ද අමාත්යවරයා මෙහිදී අවධාරණය කළේය.
කෘමිනාශක තහනම් කිරීමට අමතරව, ප්රාථමික සෞඛ්ය සේවා පද්ධතිය ශක්තිමත් කරමින් ප්රජා මට්ටමින් මානසික සෞඛ්ය සේවාවන් නැංවීම ද සියදිවි නසාගැනීම් වැළැක්වීමට අත්යවශ්ය බව අමාත්යවරයා පෙන්වා දුන්නේය. මෙම සමුළුවේදී ශ්රී ලංකාව ගෝලීය වශයෙන් කැපී පෙනෙන සාර්ථක උදාහරණයක් ලෙස ඇගයීමට ලක් වූ අතර, 1995 වසරේදී මෙරට පුද්ගලයන් ලක්ෂයකට 47 ක් ලෙස පැවති සියදිවි නසාගැනීමේ අනුපාතය, 2022 වසර වන විට ලක්ෂයකට 14 ක් දක්වා කැපී පෙනෙන ලෙස පහත වැටී ඇති බව එහිදී අනාවරණය විය.
