සෞඛ්‍ය හා ජනමාධ්‍ය අමාත්‍යාංශය යටතේ ක්‍රියාත්මක වන වෛද්‍ය සැපයුම් අංශයේ සැපයුම් කළමනාකරණ ක්‍රියාවලියේ කාර්යක්ෂමතාව, ආරක්ෂාව සහ ගුණාත්මකභාවය ඉහළ නැංවීමේ අරමුණින් රුපියල් මිලියන 130ක වටිනාකමකින් යුත් නවීන රීච් ට්‍රක් 11ක් සහ ෆෝක්ලිෆ්ට් 4ක් ඇතුළත් යාන්ත්‍රික වාහන තොගයක් නිල වශයෙන් භාරදීම අද (23) සිදු කෙරිණි. වසර 25කට අධික කාලයකට පසු එකවර මෙවැනි විශාල ද්‍රව්‍ය හැසිරවීමේ වාහන තොගයක් අත්පත් කරගත් පළමු අවස්ථාව මෙය වන අතර, මින් පෙර පැවති සීමිත හා අබලන් වාහන මෙන්ම කුලියට ගත් වාහන මත යැපීමට සිදුව තිබූ වෛද්‍ය සැපයුම් අංශයේ දිගුකාලීන අවශ්‍යතාවකට මෙයින් විසඳුම් ලැබී තිබේ.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් මෙම උපකරණ භාරදීමේ උත්සවය පැවැත්වුණු අතර, ලෝක බැංකු ව්‍යාපෘති අරමුදල් මගින් මෙම ප්‍රසම්පාදනය සිදු කර ඇත. මීට අමතරව, අදාළ ලෝක බැංකු ව්‍යාපෘතිය යටතේ ගාල්ල, කොළඹ සහ අනුරාධපුර යන ප්‍රදේශවල නව ඖෂධ ගබඩා සංකීර්ණ තුනක් ඉදිකිරීමට නියමිත අතර, 2027 වසරේදී එහි ඉදිකිරීම් කටයුතු ආරම්භ කිරීමට නියමිතය. එමඟින් දිවයින පුරා ඖෂධ ගබඩා ධාරිතාව කියුබික් මීටර් 20,000ත් 30,000ත් අතර ප්‍රමාණයකින් පුළුල් වන අතර, මෙම පුළුල් නවීකරණ වැඩසටහන හරහා දිවයින පුරා රෝහල් වෙත ඖෂධ බෙදාහැරීමේ සැපයුම් දාම කළමනාකරණය වඩාත් විධිමත් වනු ඇති බව සෞඛ්‍ය අමාත්‍යාංශය අපේක්ෂා කරයි.
