රජයේ රෝහල් පද්ධතිය තුළ හෘද සැත්කම් සඳහා පවතින පොරොත්තු ලේඛන අධික ලෙස දිගු වී ඇති බවත්, ඇතැම් රෝගීන්ට සැත්කම් සඳහා 2029 වසර දක්වා දින ලබා දී ඇති බවත් වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව මහතා පවසයි. මේ හේතුවෙන් හෘද රෝගීන් දස දහසකට අධික ප්රමාණයක් දැඩි ජීවිත අවදානමකට ලක්ව ඇති බව ඔහු පෙන්වා දෙයි.
කොළඹ, මහනුවර, ගාල්ල, අනුරාධපුරය, යාපනය සහ මඩකළපුව යන ප්රධාන රෝහල්වල මෙම තදබදය පවතින අතර, රෝගීන්ට ලබා දී ඇති දින වසර තුනකට වඩා ඈතට ගොස් තිබේ. රජයේ රෝහල්වල පවතින උපකරණ හිඟය සහ රසායනාගාර පරීක්ෂණ පෞද්ගලික අංශයෙන් සිදු කිරීමට සිදු වීම රෝගීන් තවදුරටත් අසරණ වීමට හේතු වී ඇත.
පුද්ගලික රෝහලකින් බයිපාස් (Bypass) සැත්කමක් හෝ ස්ටෙන්ට් (Stent) එකක් දැමීම සඳහා මූලික පිරිවැය රුපියල් ලක්ෂ 15 සීමාව දක්වා ඉහළ ගොස් ඇති අතර, දැඩි සත්කාර ඒකකයේ ගත කරන දින ගණන අනුව මෙම මුදල තවදුරටත් වැඩි වේ. මෙරට සෞඛ්ය රක්ෂණ ක්රමවේදයන් නිසි පරිදි ක්රියාත්මක නොවීම නිසා සාමාන්ය ජනතාවට මෙම පිරිවැය දරාගත නොහැකි මට්ටමක පවතී.
ජනාධිපති අරමුදලෙන් හෘද සැත්කම් සඳහා ආධාර ලබා දෙන බව රජය පැවසුවද, එය ප්රායෝගිකව ක්රියාත්මක වන බවක් නිරීක්ෂණය නොවන බව විශේෂඥ වෛද්යවරයා සඳහන් කරයි. මෙම තත්ත්වයට රජය කඩිනමින් මැදිහත් නොවන්නේ නම් ප්රතිකාර නොලැබීමෙන් විශාල රෝගීන් සංඛ්යාවක් ජීවිතක්ෂයට පත්වීමේ අවදානමක් පවතින බවට ඔහු අනතුරු අඟවයි.
