රටේ උද්ධමනය සියයට හත (7%) දක්වා වැඩිවී ඇති බව ශ්රී ලංකා මහ බැංකුවේ ප්රධානීන් දැනුම් දුන් බව සමගි ජන බලවේගයේ කුරුණෑගල දිස්ත්රික් මන්ත්රී ජේ.සී. අලවතුවල මහතා අද පාර්ලිමේන්තුවේදී පැවසීය. විදුලි සංදේශ බදු (සංශෝධන) පනත් කෙටුම්පත, මුදල් (සංශෝධන) පනත් කෙටුම්පත දෙවැනි වර කියවීමේ විවාදය සහ අත්යවශ්ය මහජන සේවා පනත යටතේ වන යෝජනා සම්මතය පිළිබඳ විවාදයට එක්වෙමින් මන්ත්රීවරයා මේ බව සඳහන් කළේය.
එහිදී වැඩිදුරටත් අදහස් දැක්වූ අලවතුවල මහතා කියා සිටියේ, රටේ ජනතාව අද වන විට දැඩි ආර්ථික දුෂ්කරතාවලින් ජීවත් වන බවත්, රටේ දුප්පත්කම සියයට 30කින් පමණ ඉහළ ගොස් ඇති බවත්ය. ඩොලරයේ අගය ඉහළ යාම හේතුවෙන් ආනයනික භාණ්ඩ සියල්ලේම මිල ගණන් ඉහළ ගොස් ඇති අතර, අපනයනකරුවන්ට පනවා ඇති විවිධ වාරණ හේතුවෙන් රට නැවතත් 2022 වසරේ පැවති අවාසනාවන්ත තත්ත්වයට ඇද වැටෙමින් පවතින බවද ඔහු සඳහන් කළේය. රජය වහාම උද්ධමනය පාලනය කිරීමට පියවර ගත යුතු බව අවධාරණය කළ මන්ත්රීවරයා, වත්මන් පාලනයට පෙර පැවති ආර්ථික ස්ථාවරත්වය පවා පවත්වා ගැනීමට නොහැකි වී ඇති බවත්, ලක්ෂ සංඛ්යාත පිරිසකට රැකියා අහිමි වෙමින් තුල්හිරිය මාක්ස් ආයතනය සහ නිවිතිගල කර්මාන්තශාලා වැනි ආයතන වැසී ගොස් ඇති බවත් පෙන්වා දුන්නේය.
