සිය ආදායම් බදු වගකීම් හිතාමතාම පැහැර හරින පුද්ගලයින්ට සහ ආයතනවලට එරෙහිව අපරාධමය නඩු පැවරීමට දේශීය ආදායම් දෙපාර්තමේන්තුව තීරණය කර තිබේ. 2026 අංක 11 දරණ දේශීය ආදායම් සංශෝධන පනත මගින් මෙම නීතිමය පියවර ගැනීම සඳහා දේශීය ආදායම් කොමසාරිස් ජනරාල්වරයාට පූර්ණ බලතල හිමිව ඇත.
මෙම නීතිය යටතේ බදු කටයුතු සඳහා ලියාපදිංචි වීමට අපොහොසත් වීම, නියමිත පරිදි ආදායම් බදු වාර්තා ගොනු නොකිරීම සහ රඳවා ගැනීමේ බදු සහ අත්තිකාරම් පුද්ගල ආදායම් බදු සඳහා වාර්ෂික ප්රකාශන ඉදිරිපත් නොකිරීම වැනි කරුණු මුල් කරගනිමින් අධිකරණ ක්රියාමාර්ග ගත හැකිය. කෙසේ වෙතත්, මෙය අවසන් විකල්පය ලෙස භාවිතා කිරීමට දෙපාර්තමේන්තුව සැලසුම් කර ඇත. නඩු පැවරීමට පෙර අදාළ පාර්ශවයට නිල වශයෙන් දැනුම් දෙන අතර, තම බදු බැඳීම් සපුරාලීම සඳහා දින 30ක සහන කාලයක් ලබා දෙනු ලැබේ. එම කාලය තුළත් අදාළ අවශ්යතා ඉටු නොකරන්නේ නම් මහෙස්ත්රාත් අධිකරණය ඉදිරියේ නඩු පවරනු ඇත.
අධිකරණයේදී වරදකරු වුවහොත් රුපියල් ලක්ෂ 4කට නොවැඩි දඩයක්, මාස 6කට නොවැඩි සිරදඬුවමක් හෝ එම දඬුවම් දෙකම පැනවීමට නීතිමය ප්රතිපාදන පවතී. මෙම වැඩපිළිවෙල සහයෝගයෙන් කටයුතු කරන බදු ගෙවන්නන් සඳහා නොව, හිතාමතාම බදු වංචා කරන පිරිස් ඉලක්ක කර ගනිමින් පමණක් ක්රියාත්මක කරන බව දේශීය ආදායම් දෙපාර්තමේන්තුව වැඩිදුරටත් අවධාරණය කරයි.
