හිතාමතාම ආදායම් බදු වගකීම් ඉටු කිරීමට අපොහොසත් වන පුද්ගලයින් සහ ආයතනවලට එරෙහිව අපරාධමය නඩු පැවරීම සඳහා කටයුතු ආරම්භ කර ඇති බව දේශීය ආදායම් දෙපාර්තමේන්තුව නිවේදනය කරයි. 2026 අංක 11 දරණ දේශීය ආදායම් (සංශෝධන) පනත මගින් මෙම නීතිමය බලය දේශීය ආදායම් කොමසාරිස් ජනරාල්වරයා වෙත හිමිව ඇති අතර, ආදායම් බදු සඳහා ලියාපදිංචි නොවී සිටීම, බදු වාර්තා ඉදිරිපත් නොකිරීම සහ රඳවා ගැනීමේ බදු සහ අත්තිකාරම් පුද්ගල ආදායම් බදු ප්රකාශ ඉදිරිපත් නොකිරීම වැනි කරුණු පදනම් කරගනිමින් මෙම පියවර ගනු ලබයි.
නීතිමය ක්රියාවලියක් අනුගමනය කිරීමෙන් පසු නඩු පැවරීම අවසන් විකල්පය ලෙස භාවිත කිරීමට දෙපාර්තමේන්තුව තීරණය කර ඇත. ඒ අනුව, නඩු පැවරීමට පෙර අදාළ පාර්ශ්ව වෙත ලිඛිත දැනුම්දීමක් නිකුත් කර දින 30ක සහන කාලයක් ලබාදීමට කටයුතු කෙරෙනු ඇත. එම කාලසීමාව තුළද අවශ්ය බදු බැඳීම් ඉටු කිරීමට අපොහොසත් වුවහොත්, එය නීතිමය වරදක් ලෙස සලකා මහෙස්ත්රාත් අධිකරණයක් ඉදිරියේ නඩු පැවරීමට කටයුතු කරනු ලැබේ.
එවැනි නඩු විභාගයකින් පසු චෝදනාවට වරදකරු වන පුද්ගලයින්ට හෝ ආයතනවලට රුපියල් 400,000ක් නොඉක්මවන දඩයක් හෝ මාස 06ක් නොඉක්මවන සිරදඬුවමක්, නැතහොත් එම දඬුවම් දෙකම ලබා දීමට අධිකරණයට බලය ඇත. මෙම වැඩපිළිවෙල හිතාමතා බදු වංචා කරන පිරිස් ඉලක්ක කරගෙන පමණක් ක්රියාත්මක කෙරෙන අතර, සිය බදු බැඳීම් නිසි පරිදි ඉටු කරන සහ දෙපාර්තමේන්තුව සමඟ සහයෝගයෙන් කටයුතු කරන බදු ගෙවන්නන්ට කිසිදු බලපෑමක් නොවන බව දේශීය ආදායම් දෙපාර්තමේන්තුව වැඩිදුරටත් අවධාරණය කර සිටී.
