ශ්රී ලංකා රක්ෂණ නියාමන කොමිෂන් සභාව (IRCSL) විසින් මෙරට රක්ෂණ ක්ෂේත්රය නව මානයකට ඔසවා තැබීම සඳහා වූ “2030-2035 රක්ෂණ කර්මාන්ත මාර්ග සිතියම” ඊයේ කොළඹදී එළිදක්වන ලදී. මෙම නව උපායමාර්ගික සැකසුම හරහා 2030 වසර වන විට මෙරට රක්ෂණ වාරික ආදායම රුපියල් බිලියන 700 සීමාවෙන් ඔබ්බට රැගෙන යාම රජයේ සහ නියාමන ආයතනවල මූලික ඉලක්කය වී තිබේ.
වසරකට 14%ක වර්ධන වේගයක් පවත්වා ගනිමින්, දැනට දළ දේශීය නිෂ්පාදිතයෙන් 1%කට මඳක් වැඩි මට්ටමක පවතින රක්ෂණ ව්යාප්තිය 2030 වන විට දෙගුණයකින් සහ 2035 වන විට තෙගුණයකින් ඉහළ නැංවීමට මෙහිදී සැලසුම් කර ඇත. 2025 වසරේදී රුපියල් බිලියන 380ක්ව පැවති සමස්ත රක්ෂණ වාරික සංචිතය මෙම නව වැඩපිළිවෙළ යටතේ වේගයෙන් වර්ධනය වනු ඇතැයි අපේක්ෂා කෙරේ.
ඩිජිටල් මෝටර් රථ රක්ෂණ කාඩ්පත් (Digital Motor Cards) හඳුන්වා දීම සහ මධ්යගත දත්ත පද්ධතියක් (Centralised Data System) ස්ථාපනය කිරීම හරහා මූල්ය විනය සහ කාර්යක්ෂමතාව ඉහළ නැංවීමට ද පියවර ගෙන ඇත. වර්තමානයේ රුපියල් ට්රිලියන 1.4කට අධික වත්කම් ප්රමාණයක් කළමනාකරණය කරන රක්ෂණ ක්ෂේත්රය, රැකියා 69,000කට වැඩි ප්රමාණයකට දායකත්වය සපයමින් මෙරට ආර්ථිකයේ ප්රධාන ස්ථම්භයක් ලෙස ක්රියා කරයි.
