ශ්රී ලංකාවේ ආයෝජන ප්රවර්ධනය කිරීම, අපනයන ආදායම් ඉහළ නැංවීම සහ කුඩා හා මධ්ය පරිමාණ ව්යවසායයන් (SME) ශක්තිමත් කිරීම අරමුණු කරගනිමින් වසර තුනක උපාය මාර්ගික සැලැස්මක් ක්රියාත්මක කරන බව ලංකා වාණිජ මණ්ඩලය (CCC) නිවේදනය කරයි.
පසුගියදා පැවති මණ්ඩලයේ 187 වන වාර්ෂික මහා සභා රැස්වීමේදී නැවත සභාපතිවරයා ලෙස තේරී පත් වූ ක්රිෂාන් බාලේන්ද්ර මහතා සඳහන් කළේ, සාම්ප්රදායික ප්රතිපත්ති උපදේශනයෙන් ඔබ්බට යමින්, රජය සහ පෞද්ගලික අංශය අතර සහයෝගීතාවය තුළින් ප්රායෝගික විසඳුම් ලබා දීම සඳහා මණ්ඩලය කැපවී සිටින බවයි.
පසුගිය වසර තුළ මණ්ඩලය විසින් ඉදිරිපත් කළ නිර්දේශ 18ක් 2026 අයවැයට ඇතුළත් කර ගැනීමට කටයුතු කිරීම ආර්ථික ප්රතිපත්ති සම්පාදනය සඳහා ලැබුණු ජයග්රහණයක් බව ඔහු පෙන්වා දුන්නේය. විශේෂයෙන්ම වෙළඳ පහසුකම් සැලසීම, ඩිජිටල්කරණය, යටිතල පහසුකම් සංවර්ධනය සහ ව්යාපාර කිරීමේ පහසුව වැඩිදියුණු කිරීම සම්බන්ධයෙන් මණ්ඩලය සක්රීයව දායක වී ඇත.
එමෙන්ම ජාත්යන්තර මූල්ය අරමුදල (IMF) සමඟ පැවති සාකච්ඡාවලදී පෞද්ගලික අංශයේ අදහස් නියෝජනය කිරීමත්, මධ්යම පෙරදිග කලාපයේ ගැටුම් හේතුවෙන් ඇති වූ භාණ්ඩ ප්රවාහන හා අපනයන ගැටළු අවම කිරීමට රජයට නිර්දේශ ඉදිරිපත් කිරීමත් මණ්ඩලය ඉටු කළ සේවාවන් අතර වේ. මීට අමතරව පසුගිය වසරේදී කුඩා හා මධ්ය පරිමාණ ව්යවසායයන් 1,800කට අධික සංඛ්යාවකට පුහුණුව හා උපදේශන සේවා සැපයීමට ද ලංකා වාණිජ මණ්ඩලය කටයුතු කර ඇත.
2026/27 වසර සඳහා ලංකා වාණිජ මණ්ඩලයේ නව නිලධාරී මණ්ඩලය ලෙස ක්රිෂාන් බාලේන්ද්ර (සභාපති), බිංගුමාල් තේවරාතන්ත්රි (උප සභාපති) සහ විනෝද් හිරදwani (නියෝජ්ය උප සභාපති) යන මහත්වරුන් පත් කර ඇත.
