ශ්රී ලංකාවේ විදුලිබල ක්ෂේත්රයේ සුවිශේෂී සන්ධිස්ථානයක් සනිටුහන් කරමින්, රටේ මෙතෙක් ක්රියාත්මක වන විශාලතම බැටරි බලශක්ති ගබඩා කිරීමේ ව්යාපෘතිය ආරම්භ කර තිබේ. රට පුරා පිහිටි උපපොළවල් 16ක මෙම බැටරි බලශක්ති ගබඩා පද්ධති ක්රියාත්මක කිරීමට නියමිත අතර, මෙය ජාතික විදුලි පද්ධතිය ශක්තිමත් කිරීමටත්, පිරිසිදු හා සුරක්ෂිත බලශක්ති පද්ධතියක් ගොඩනැගීමටත් විශාල පිටුවහලක් වනු ඇත.
මෙම ව්යාපෘතියේ ප්රධාන විශේෂාංග කිහිපයක් පහත දැක්වේ.
සෑම බැටරි පද්ධතියක්ම දහවල් කාලයේදී මෙගාවොට් පැය 40ක විදුලි බලයක් ගබඩා කර ගැනීමටත්, සවස් කාලයේ විදුලි ඉල්ලුම ඉහළ යන වේලාවන්හිදී ජාතික පද්ධතියට මෙගාවොට් 10ක් දක්වා විදුලිය මුදා හැරීමටත් සැලසුම් කර ඇත. දහවල් කාලයේ නිපදවන සූර්ය සහ සුළං බලය සවස් කාලය සඳහා ඉතිරි කර ගැනීම මගින් පුනර්ජනනීය බලශක්තිය උපරිම ලෙස භාවිත කළ හැකි අතර, විදුලි ඉල්ලුම වැඩිම වේලාවන්හිදී ඛනිජ තෙල් හා ගල්අඟුරු වැනි සාම්ප්රදායික ඉන්ධන මත යැපීම අඩු කර ගැනීමට මෙය ඉඩ සලසයි.
වැඩපිළිවෙළ යටතේ උපපොළවල් 13ක නවීන “Grid-forming” බැටරි තාක්ෂණය භාවිතා කෙරේ. එමගින් විදුලි පද්ධතියේ සංඛ්යාතය සහ වෝල්ටීයතාවය ක්රියාකාරීව පාලනය කරමින්, සූර්ය සහ සුළං බලය වැඩි වශයෙන් ජාතික පද්ධතියට එකතු කිරීමේදී පද්ධතියේ ස්ථාවරත්වය ආරක්ෂා කර ගත හැකිය. 2030 වසර වන විට 70%ක් පුනර්ජනනීය බලශක්තිය ලබාගැනීමේ ශ්රී ලංකාවේ ජාතික ඉලක්කය සපුරා ගැනීමට මෙය සෘජු දායකත්වයක් සපයයි.
2025 ජූලි මාසයේ පැවති ජාත්යන්තර තරඟකාරී ටෙන්ඩර් ක්රියාවලියෙන් Windforce PLC සහ Vidullanka PLC සමාගම් මෙම ව්යාපෘතිය ජයග්රහණය කළ අතර, ඔවුන්ගේ තාක්ෂණික සැපයුම්කරු ලෙස Huawei සමාගම තෝරා ගැනිණි. දේශීය පුනර්ජනනීය බලශක්ති ක්ෂේත්රයේ අත්දැකීම් සහ Huawei සමාගමේ ගෝලීය තාක්ෂණික දැනුම ඒකාබද්ධ කරමින් සිදු කෙරෙන මෙම ව්යාපෘතිය, බලශක්ති ආරක්ෂාව ශක්තිමත් කිරීමටත්, පාරිභෝගිකයන්ට විශ්වාසවන්ත හා සහනදායී මිලකට විදුලිය ලබා දීමටත් මහෝපකාරී වනු ඇත.
