නව අධ්යාපන ප්රතිසංස්කරණ යටතේ ක්රියාකාරකම් පාදක අධ්යාපන ක්රමවේදය සඳහා මග කියමින්, පෙර පාසල තුළින්ද ළමයාව ගවේෂණාත්මක අධ්යාපන ක්රමයකට හැඩගැස්වීම සඳහා මුල් ළමාවිය අධ්යාපන විෂයමාලා රාමුවට අනුව සකස් කරන ලද ගුරු මාර්ගෝපදේශය සහ ක්රියාකාරකම් මාර්ගෝපදේශ සංග්රහය පසුගියදා ඉසුරුපාය අධ්යාපන අමාත්යාංශ පරිශ්රයේදී අග්රාමාත්යවරියගේ ප්රධානත්වයෙන් එළිදැක්වුණි.
සෑම දරුවෙකුටම ජීවිතයේ ආරම්භයේ සිටම ගුණාත්මක අධ්යාපනයක් ලබාදීම තහවුරු කරමින්, රජයේ නව අධ්යාපන ප්රතිසංස්කරණ වැඩපිළිවෙළට අනුගතව මෙය සකසා ඇත. ඒ අනුව, සෙල්ලම් කිරීම මත පදනම් වූ මෙවලම් භාවිතයෙන් දරුවන්ව පෙර පාසල් අධ්යාපනයේ සිටම ක්රියාකාරකම් පාදක අධ්යාපන රටාවකට හැඩගැස්වීමට අවශ්ය මගපෙන්වීම, පෙර පාසල් ගුරුවරුන්ට, පුහුණුකරුවන්ට හා අනෙකුත් පාර්ශ්වයන්ට ලබාදීම මෙම මාර්ගෝපදේශ සංග්රහය හරහා සිදුකෙරේ.
“නිවැරදි ආරම්භයක්” (Starting Right) යන තේමාව යටතේ සකස් කරන ලද මෙම මුල් ළමාවිය සහායක සම්පත් මාර්ගෝපදේශ සංග්රහය, ගුරු මාර්ගෝපදේශය, යෝජිත ක්රියාකාරකම් මාර්ගෝපදේශය, ඉගැන්වීම් ඉගෙනුම් ද්රව්ය අත්පොත සහ Master Material පුහුණු අත්පොත ලෙස ප්රධාන ක්ෂේත්ර හතරකින් සමන්විත වේ. දිවයිනේ ඇති සියලුම පෙර පාසල් ආවරණය වන පරිදි මෙම වැඩපිළිවෙළ ක්රියාත්මක කිරීමට නියමිත අතර, ඒ සඳහා අවශ්ය පුහුණුකරුවන් සහ ගුරුවරුන් පුහුණු කිරීමේ කටයුතුද මීට සමගාමීව දීපව්යාප්ත වශයෙන් සිදුකෙරෙමින් පවතී.
අධ්යාපන, උසස් අධ්යාපන සහ වෘත්තීය අධ්යාපන අමාත්යාංශයේ සහ කාන්තා හා ළමා කටයුතු අමාත්යාංශයේ මෙහෙයවීම යටතේ මෙය ක්රියාත්මක වන අතර, ජාතික අධ්යාපන ආයතනය සහ යුනිසෙෆ් (UNICEF) සංවිධානය ඇතුළු ආයතන ගණනාවක ඒකාබද්ධ සහයෝගය මීට හිමිව තිබේ. ජාතික අධ්යාපන ආයතනයේ නිල වෙබ් අඩවිය ඔස්සේ මෙම මාර්ගෝපදේශ සංග්රහය මාර්ගස්ථ ක්රමයට භාගත කිරීමේ හැකියාවද පවතියි.
