ශ්රී ලංකාව සහ චීනය අතර ද්විපාර්ශ්වික සබඳතාවලට වසර 70ක් සපිරෙන 2027 වසර ඉලක්ක කරගනිමින්, වාර්ෂිකව චීන සංචාරකයන් ලක්ෂ 10ක් (මිලියනයක්) මෙරටට ගෙන්වා ගැනීම සඳහා වන දැවැන්ත ප්රවර්ධන වැඩසටහනක් විදේශ කටයුතු අමාත්යාංශය විසින් චීනයේ බෙයිජිං නුවරදී සාර්ථකව පවත්වා තිබේ. බෙයිජිංහි ශ්රී ලංකා තානාපති කාර්යාලය සහ ශ්රී ලංකා සංචාරක ප්රවර්ධන කාර්යාංශය එක්ව සංවිධානය කළ මෙම හමුවට චීනයේ ප්රමුඛ පෙළේ සංචාරක නියෝජිත ආයතන, මාධ්ය සහ ආයෝජකයන් ඇතුළු නියෝජිතයන් 120කට අධික පිරිසක් එක්ව සිටියහ.
මෙහිදී අදහස් දැක්වූ නියෝජ්ය දූත මණ්ඩල ප්රධානී පූර්ණිමා ගුණසේකර මහත්මිය පෙන්වා දුන්නේ 2025 වසරේදී චීනයෙන් පැමිණි සංචාරකයන් සංඛ්යාව 132,000ක් පමණ වූ අතර, තායිලන්තය සහ මැලේසියාව වැනි රටවලට සාපේක්ෂව චීන වෙළෙඳපොළ තුළ ශ්රී ලංකාවට තවමත් විශාල ප්රවර්ධන විභවයක් පවතින බවයි. චීනය ඇතුළු රටවල් 40ක් සඳහා ශ්රී ලංකාව ක්රියාත්මක කර ඇති වීසා රහිත ප්රවේශ පහසුකම පිළිබඳවද මෙහිදී විශේෂ අවධානයක් යොමු කෙරුණි.
සංචාරක ක්ෂේත්රය නැංවීම සඳහා දැනට ක්රියාත්මක සතිපතා ගුවන් වාර 23ට අමතරව, එළඹෙන 2026 සැප්තැම්බර් මාසයේ සිට ‘බෙයිජිං කැපිටල් එයාර්ලයින්ස්’ (Beijing Capital Airlines) සෘජු ගුවන් ගමන් යළි ආරම්භ කරන බවද මෙහිදී නිල වශයෙන් නිවේදනය කෙරුණි. “Go Beyond One Destination – Discover the Ultimate Asian Dream Vacation” යන තේමාව යටතේ ක්රියාත්මක වන මෙම නව වැඩපිළිවෙළ හරහා අග්නිදිග ආසියාවට පැමිණෙන චීන සංචාරකයන් මෙරටට ආකර්ෂණය කර ගැනීමටත්, මාලදිවයින සමඟ ඒකාබද්ධ සංචාරක පැකේජ හඳුන්වා දීමටත් සැලසුම් කර ඇත.
ඉතා කෙටි කාලයකදී වනජීවී, වෙරළ, ලෝක උරුම සහ තේ වතු වැනි විවිධ අත්දැකීම් රාශියක් එකම රටකින් විඳගත හැකි වීම ශ්රී ලංකාවේ ඇති සුවිශේෂත්වය බව චීන නියෝජිතයන්ට පෙන්වා දී තිබේ. මීට අමතරව, මිලියන 100කට අධික ප්රේක්ෂක ප්රතිචාර ලබන ප්රසිද්ධ චීන සමාජ මාධ්ය ක්රියාකාරිකයෙකු වන ඇලෙක්ස් බාඕ (Alex Bao) ද මෙම අවස්ථාවට එක්වෙමින් ශ්රී ලංකාවේ සංචාරය කිරීමට ඇති සිය දැඩි උනන්දුව පළ කර සිටියේය. ශ්රී ලංකාව ගැන මෙතෙක් ප්රවර්ධනය නොකළ චීන සංචාරක නියෝජිතයන් සහ මාධ්යවේදීන් උදෙසා විශේෂ හඳුනාගැනීමේ චාරිකා දෙකක් සංවිධානය කිරීමටද මෙහිදී තීරණය වී තිබේ.
