ආබාධ සහිත පුද්ගලයන්ට සේවාවන් සපයන රාජ්ය ආයතනවල ප්රවේශ පහසුකම් (Accessibility) සහ සනීපාරක්ෂක පහසුකම් පිළිබඳ ජාතික මට්ටමේ විගණනයක් පසුගිය අඟහරුවාදා (ජුනි 09) බත්තරමුල්ල, සෙත්සිරිපාය පරිශ්රයේදී ආරම්භ විය.
2026 වසරේ අයවැය යෝජනා යටතේ ප්රාදේශීය ලේකම් කාර්යාල, දුම්රිය ස්ථාන, බස් නැවතුම්පළවල්, අධිකරණ සහ පොලිස් ස්ථාන ඇතුළු රාජ්ය ආයතනවල ප්රවේශ පහසුකම් වැඩිදියුණු කිරීම සඳහා රුපියල් මිලියන 1,000ක මුදලක් වෙන් කර තිබේ. මෙම විගණනය ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ අමාත්යාංශය යටතේ ක්රියාත්මක වන ආබාධ සහිත පුද්ගලයන් සඳහා වූ ජාතික ලේකම් කාර්යාලය විසින් මෙහෙයවනු ලබයි.
මෙම වැඩපිළිවෙළට සමගාමීව, ජාත්යන්තර මැතිවරණ පද්ධති පදනම (IFES) මගින් දිස්ත්රික්ක 17ක් ආවරණය වන පරිදි සමාජ සේවා නිලධාරීන්ට සහ ආබාධ සහිත පුද්ගලයන්ට න්යායාත්මක සහ ප්රායෝගික පුහුණුවක් ලබා දී ඇත. මෙම විගණන වැඩසටහනේ පළමු අදියර ලෙස කොළඹ දිස්ත්රික්කයේ පුහුණු කරන ලද නිලධාරීන්ගේ සහභාගීත්වයෙන් සෙත්සිරිපාය පළමු සහ දෙවන අදියර කාර්යාල සංකීර්ණයේ විගණන කටයුතු ආරම්භ කෙරිණි.
මෙම වැඩපිළිවෙළ හරහා රාජ්ය ආයතන ආබාධ සහිත පුද්ගලයන්ට බාධාවකින් තොරව සේවාවන් ලබාගත හැකි ස්ථාන බවට පත් කිරීමත්, ඔවුන්ට ගෞරවාන්විතව සේවාවන් ලබා ගැනීමට අවශ්ය පසුබිම සකස් කිරීමත් රජයේ අපේක්ෂාවයි.
