ශ්රී ලංකාව ඩිජිටල් ආර්ථිකයක් කරා ගෙන යාමේ අරමුණින් රාජ්ය සේවය ඩිජිටල්කරණය කිරීමේ සහ නිලධාරීන්ගේ තාක්ෂණික කුසලතා වර්ධනය කිරීමේ ජාතික වැඩපිළිවෙළ ආරම්භ කර තිබේ. ඩිජිටල් ආර්ථික නියෝජ්ය අමාත්ය එරංග වීරරත්න සහ පළාත් සභා හා පළාත් පාලන නියෝජ්ය අමාත්ය රුවන් සෙනරත් යන මහත්වරුන්ගේ ප්රධානත්වයෙන් ඊයේ (03) ඒ පිළිබඳ විශේෂ සාකච්ඡාවක් පැවැත්විණි.
ගෝලීය තාක්ෂණික ප්රවණතා සමඟ රාජ්ය සේවයේ කාර්යක්ෂමතාව ඉහළ නැංවීම, සේවා ප්රමාදයන් අවම කිරීම සහ පුද්ගලයන් මත පදනම් වූ ක්රමවේදවලින් පද්ධති මත පදනම් වූ නවීන සේවා සැපයුම් ක්රමවේදයකට පරිවර්තනය වීම මෙහි මූලික අරමුණු වේ. ජ්යෙෂ්ඨ නිලධාරීන්ගේ තාක්ෂණික බිය දුරලීම, සයිබර් ආරක්ෂාව පිළිබඳ දැනුවත්භාවය සහ රාජ්ය සේවකයන්ගේ ඩිජිටල් කුසලතා වර්ධනය කිරීම ප්රමුඛත්වයේ පවතී.
මෙම වැඩපිළිවෙළ යටතේ රාජ්ය සේවකයන් පුහුණු කිරීම සඳහා ඊ-ඉගෙනුම් පද්ධතියක් සහ කෙටි වීඩියෝ පාඩම් මාලා සහිත Micro-learning ක්රමවේදයක් හඳුන්වා දීමට නියමිතය. ඩිජිටල් සාක්ෂරතා පාඨමාලා සම්පූර්ණ කිරීම රාජ්ය නිලධාරීන්ගේ වාර්ෂික කාර්යසාධන ඇගයීම් සහ උසස්වීම් සඳහා අනිවාර්ය අවශ්යතාවක් බවට පත් කිරීම පිළිබඳවද සාකච්ඡා වී ඇත. කාර්යාල සහ පාසල් පරිගණක විද්යාගාර පස්වරු කාලයේ පුහුණු කටයුතු සඳහා භාවිත කිරීම මෙන්ම Gamification ක්රමවේද සහ ඩිජිටල් අත්සන් සහිත සහතික හඳුන්වා දීමටද එකඟතාව පළ විය.
මෙම ව්යාපෘතිය දැනට සේවයේ නියුතු නිලධාරීන් පුහුණු කිරීම, නව බඳවා ගැනීම් සඳහා ඩිජිටල් සුදුසුකම් අනිවාර්ය කිරීම සහ පාසල් හා විශ්වවිද්යාල විෂයමාලා ඩිජිටල් ආර්ථිකයට ගැළපෙන ලෙස සංවර්ධනය කිරීම යන තෙවැදෑරුම් සැලැස්ම යටතේ ක්රියාත්මක වේ. මූලික අදියර ලෙස සයිබර් ආරක්ෂාව පිළිබඳ කෙටි පාඨමාලාවක් සහ නිල විද්යුත් තැපැල් භාවිතය පිළිබඳ ප්රායෝගික පුහුණුවක් ලබාදීමට නියමිතයි.
