ශ්වසන රෝග ඇති වීමේ ප්රවණතාව අඩු කරමින් ශ්රී ලංකාව තුළ දුම්කොළ භාවිතය සහ දුම්පානය සම්පූර්ණයෙන්ම නැවැත්වීමේ උපාය මාර්ග ශක්තිමත් කිරීම අරමුණු කරගත් විශේෂ සාකච්ඡාවක් සහ මාධ්ය හමුවක් සෞඛ්ය නියෝජ්ය අමාත්ය වෛද්ය හංසක විඡේමුණි මහතාගේ ප්රධානත්වයෙන් කොළඹ සිනමන් ලේක්සයිඩ් හෝටලයේ දී පවත්වා තිබේ. ආසියානු ජනගහනයේ අවදානම් සහිත කොට්ඨාශයන්හි සෞඛ්ය මට්ටම ඉහළ නැංවීම සඳහා ක්රියාත්මක වන ගෝලීය සෞඛ්ය පිළිබඳ “Respire” ව්යාපෘතිය යටතේ ශ්රී ලංකාවේ ප්රමුඛ පෙළේ විශ්වවිද්යාල 5ක් වන ශ්රී ජයවර්ධනපුර, පේරාදෙණිය, රජරට, වයඹ සහ ජෙනරාල් ශ්රීමත් ජෝන් කොතලාවල ආරක්ෂක විශ්වවිද්යාලය එක්ව මෙම වැඩසටහනය සංවිධානය කර තිබුණි.
මෙහිදී කොතලාවල ආරක්ෂක විශ්වවිද්යාලයේ ජ්යෙෂ්ඨ කථිකාචාර්ය ආචාර්ය ප්රසන්න හේරත් මහතා විසින් ඒක පුද්ගල දුම්පානය නිවාරණය කිරීම සඳහා වන විද්යාත්මක ක්රමවේදයක් හඳුන්වා දුන් අතර, නවසීලන්තයේ ඕක්ලන්ඩ් විශ්වවිද්යාලයේ මහාචාර්ය ක්රිස් බුලන් (Prof. Chris Bullen) මහතා සූම් (Zoom) තාක්ෂණය ඔස්සේ සම්බන්ධ වෙමින් දුම්පානය නැවැත්වීමේ ජාතික වැඩසටහනක පවතින සාක්ෂි මත පදනම් වූ විද්යාත්මක ප්රවේශයන් පිළිබඳ ප්රධාන දේශනය පවත්වන ලදී.
මාධ්ය හමුව අමතමින් සෞඛ්ය නියෝජ්ය අමාත්ය වෛද්ය හංසක විඡේමුණි මහතා අවධාරණය කළේ, ලෝකයේ වළක්වා ගත හැකි මරණවලට ප්රධානතම හේතුව දුම්කොළ භාවිතය වන අතර, එය මෙරට සෞඛ්ය පද්ධතියට මෙන්ම පවුල්වල ආර්ථිකයට ද දැවැන්ත බරක් වී ඇති බවයි. රෝගවලට ලක්වීමට ඉඩහැර ප්රතිකාර කිරීමට වඩා රෝග ඇතිවීමට පෙර ඒවා වැළැක්වීම රජයේ ජාතික ප්රමුඛතාවක් බව පැවසූ අමාත්යවරයා, දුම්පානය මෙරටින් සම්පූර්ණයෙන්ම තුරන් කිරීම රජයේ ප්රධාන උත්සාහය බව ද ප්රකාශ කළේය. තරුණයින් ඉලක්ක කරගනිමින් වක්ර අලෙවිකරණය සහ ආකර්ශනීය නිෂ්පාදන සැලසුම් හරහා පැමිණෙන නව ආකාරයේ සියලු නිකොටින් ඇබ්බැහිවීම්වලට එරෙහිව රජය සුපරීක්ෂාකාරීව සිටින බවත්, දුම්කොළ නිෂ්පාදන සඳහා බදු අඛණ්ඩව වැඩි කිරීමට කටයුතු කර ඇති බවත් ඔහු මෙහිදී වැඩිදුරටත් සඳහන් කළේය.
