නව අධ්‍යාපන ප්‍රතිසංස්කරණ පිළිබඳ ජාතික සංවාදයක් ඇති කරමින්, ඒ සම්බන්ධයෙන් සත්‍ය හා නිවැරදි තොරතුරු ජනතාව වෙත ගෙන යාමේදී මෙරට ජනමාධ්‍යයට ප්‍රමුඛ කාර්යභාරයක් පැවරෙන බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය පවසයි.
නව අධ්‍යාපන ප්‍රතිසංස්කරණ පිළිබඳ ජනතාව දැනුවත් කිරීම සඳහා සකස් කළ RIES (Reform Information & Enquiry Service) නිල වෙබ් අඩවිය එළිදැක්වීම සහ විද්‍යුත් හා මුද්‍රිත මාධ්‍ය ආයතන ප්‍රධානීන් දැනුවත් කිරීම වෙනුවෙන් ඊයේ (14) අරලියගහ මන්දිරයේ පැවැති වැඩසටහනට එක්වෙමින් අග්‍රාමාත්‍යවරිය මේ බව සඳහන් කළාය.
අධ්‍යාපන ප්‍රතිසංස්කරණ සම්බන්ධයෙන් මහජනතාවට තොරතුරු ලබාගැනීමට සහ ගැටලු යොමු කිරීමට https://edureformfact.moe.gov.lk වෙබ් අඩවියට පිවිසිය හැකිය.
මෙහිදී අදහස් දක්වමින් අග්‍රාමාත්‍යවරිය පෙන්වා දුන්නේ මෙම ප්‍රතිසංස්කරණ විෂයමාලා වෙනසකට පමණක් සීමා නොවී සමස්ත අධ්‍යාපන ක්‍රමයේ පරිවර්තනයක් අරමුණු කරගත් ජාතික කාර්යයක් බවයි. 2026 වසරේ පළමු ශ්‍රේණියෙන් ප්‍රතිසංස්කරණවල එක් අදියරක් ආරම්භ කර ඇති අතර, 2027 වසරේදී හයවන ශ්‍රේණියට ද ඒවා හඳුන්වා දීමට සැලසුම් කර තිබේ.
ඒ සඳහා ගුරු පුහුණුව, යටිතල පහසුකම් සංවර්ධනය සහ ඩිජිටල්කරණය ඇතුළු වැඩපිළිවෙළ රැසක් ක්‍රියාත්මක කරමින් පවතින බවද ඇය සඳහන් කළාය. දරුවන්ගේ අධ්‍යාපනය දේශපාලන මතභේදවලට ලක් නොකර, ඒ වෙනුවෙන් ධනාත්මක සංවාදයක් ගොඩනැගීම සියලු දෙනාගේ වගකීමක් බවද අග්‍රාමාත්‍යවරිය අවධාරණය කළාය.
අධ්‍යාපන ප්‍රතිසංස්කරණ පිළිබඳ විශේෂ දේශනයක් පැවැත්වූ මහාචාර්ය ප්‍රභාත් ජයසිංහ මහතා සඳහන් කළේ, කටපාඩම් කිරීම මත පදනම් වූ ගුරු කේන්ද්‍රීය ක්‍රමයෙන් ඔබ්බට ගොස් සිසුන් කේන්ද්‍ර කරගත්, සැබෑ ලෝකයේ අත්දැකීම් සමඟ බැඳුණු ඉගෙනුම් ක්‍රමයක් හඳුන්වා දීම ප්‍රතිසංස්කරණවල ප්‍රධාන අරමුණක් බවයි.
ඒ අනුව, දරුවන්ගේ සංජානන හැකියාවන්ට අමතරව චිත්තවේගීය, සමාජීය, ශාරීරික හා සදාචාරාත්මක සංවර්ධනය ද අවධානයට ලක් කෙරේ. තාක්ෂණික, මූල්‍ය, මාධ්‍ය හා විද්‍යාත්මක සාක්ෂරතාව මෙන්ම විවේචනාත්මක චින්තනය සහ සන්නිවේදන හැකියාවන් ඇතුළු 21 වැනි සියවසට අවශ්‍ය නිපුණතා වර්ධනය කිරීමද මෙහි අරමුණකි.
සාමාන්‍ය අධ්‍යාපනය, වෘත්තීය අධ්‍යාපනය සහ තෘතීයික අධ්‍යාපනය එකිනෙකට සම්බන්ධ කරමින් 13 වැනි ශ්‍රේණිය දක්වා දරුවන්ට අධ්‍යාපන අවස්ථා සලසා දීමත්, අවසාන විභාග මත පමණක් රඳා නොසිට විශ්ලේෂණය, නිර්මාණශීලීත්වය සහ ගැටලු විසඳීමේ හැකියාවන් අඛණ්ඩව ඇගයීමත් යෝජිත වෙනස්කම් අතරට අයත් වේ.
මෙම අවස්ථාවට නියෝජ්‍ය අමාත්‍යවරුන් වන වෛද්‍ය මධුර සෙනෙවිරත්න සහ නලින් හේවගේ යන මහත්වරුන්, අධ්‍යාපන අමාත්‍යාංශයේ ලේකම් නාලක කලුවැව මහතා, අධ්‍යාපන ක්ෂේත්‍රයේ නිලධාරීන්, මාධ්‍ය ආයතන ප්‍රධානීන්, ජ්‍යෙෂ්ඨ මාධ්‍යවේදීන් සහ අධ්‍යාපන විශේෂඥයන් ඇතුළු පිරිසක් සහභාගි වූහ.
