කසළ ප්රශ්නයට ස්ථිරසාර විසඳුමක් ලබා දීමේ අරමුණින් වසර 3ක ජාතික විද්යාත්මක සැලැස්මක් ක්රියාත්මක කිරීමට පියවර ගෙන ඇති බවත්, සැප්තැම්බර් මාසයේදී එම වැඩසටහන රටට හඳුන්වා දීමට අපේක්ෂා කරන බවත් පළාත් පාලන නියෝජ්ය අමාත්ය රුවන් සෙනරත් මහතා පවසයි.
“පිවිතුරු පුරවර” ජාතික කසළ කළමනාකරණ වැඩසටහන යටතේ කුරුණෑගල දිස්ත්රික්කයේ පැවති සාකච්ඡාවකදී අමාත්යවරයා මේ බව සඳහන් කළේය. පරිසරයට එක්වන කසළ, දිරාපත් නොවන ද්රව්ය සහ ප්ලාස්ටික් වැනි අපද්රව්ය මගින් මදුරුවන් බෝවීම ඇතුළු සෞඛ්ය ගැටලු උග්ර වී ඇති බව පෙන්වා දුන් අමාත්යවරයා, මහජන සෞඛ්යය වෙනුවෙන් කටයුතු කිරීමට පළාත් පාලන ආයතන වෙත පුළුල් නෛතික බලතල ඇති බව සිහිපත් කළේය.
ජනාධිපති අනුර කුමාර දිසානායක මහතාගේ උපදෙස් පරිදි, කසළ කළමනාකරණය සඳහා අවශ්ය ප්රතිපාදන ලබා දෙමින් මෙම විද්යාත්මක සැලැස්ම සකස් කර ඇත.
පෙර පැවති පාලන සමයන්හි මෙන් මැදිරිවල වාඩි වී සැලසුම් සකස් නොකර, ප්රායෝගිකව බිම් මට්ටමේ පවතින ගැටලු හඳුනා ගනිමින් මෙම සැලැස්ම සකස් කර තිබේ.
එදිනෙදා එකතු වන කසළ පරිසරයට බරක් නොවන, ආදායම් ලැබිය හැකි වටිනා සම්පතක් බවට පත් කිරීම මෙම වැඩසටහනේ මූලික අරමුණයි.
මෙම වැඩසටහන වසර 3ක ජාතික සැලැස්මක් ලෙස මුලින් ක්රියාත්මක වුවද, එය අඛණ්ඩව ඉදිරියට පවත්වාගෙන යා යුතු දිගුකාලීන වැඩපිළිවෙළක් බව අමාත්යවරයා වැඩිදුරටත් අවධාරණය කළේය.
