ශ්‍රී ලංකාවේ රබර් වගාව ආරම්භ කර වසර 150ක් සපිරීම නිමිත්තෙන් මෙරට වැවිලි ක්ෂේත්‍රයේ ඓතිහාසික දායකත්වය සහ අනාගත සංවර්ධන අවස්ථා පිළිබඳව අවධානය යොමුව තිබේ. 1876 වසරේදී ගම්පහ, හෙනරත්ගොඩ උද්භිද උද්‍යානයේ රබර් පැළ රෝපණය කිරීමත් සමඟ මෙරට වාණිජ රබර් වගාවේ ගමන්මඟ ආරම්භ විය.
බ්‍රිතාන්‍ය උද්භිද විද්‍යාඥ හෙන්රි වික්හැම් විසින් ඇමසන් වනාන්තරයෙන් ලබාගත් රබර් බීජ එංගලන්තයේ Kew Gardens හි රෝපණය කිරීමෙන් පසුව ඒවා ශ්‍රී ලංකාව ඇතුළු ආසියානු රටවලට හඳුන්වා දෙන ලදී. එතැන් සිට මෙරට රබර් වගාව ව්‍යාප්ත වූ අතර, පසුව එය ශ්‍රී ලංකාවේ ප්‍රධාන අපනයන බෝගයක් බවට පත්විය.
රබර් කිරි ආශ්‍රිත කර්මාන්තයේ වර්ධනයට 1839දී චාල්ස් ගුඩ්ඉයර් හඳුන්වා දුන් වල්කනීකරණ තාක්ෂණයත්, 1888දී ජෝන් බොයිඩ් ඩන්ලොප් විසින් හඳුන්වා දුන් වායු පිරවූ රබර් ටයරයත් විශාල බලපෑමක් කළේය. එම තාක්ෂණික දියුණුවත් සමඟ ලෝක වෙළෙඳපොළේ ස්වාභාවික රබර් සඳහා ඉල්ලුම ඉහළ ගිය අතර, ශ්‍රී ලංකාවේ රබර් වගාවද වේගයෙන් ව්‍යාප්ත විය.
රබර් පර්යේෂණයෙන් ලෝකයට දායකත්වයක්
1909දී ශ්‍රී ලංකා රබර් පර්යේෂණ ආයතනය (RRISL) පිහිටුවීම මෙරට රබර් කර්මාන්තයේ තීරණාත්මක සන්ධිස්ථානයක් විය. වසර සියයකට වැඩි කාලයක් පුරා එම ආයතනය රබර් වගාව, නිෂ්පාදනය සහ තාක්ෂණය සම්බන්ධ පර්යේෂණ සිදුකරමින් සිටී.
ශ්‍රී ලංකාවේ නිෂ්පාදනය කරන Latex Crepe No. 1 ශ්‍රේණියේ රබර් ලෝකයේ ඉහළ ගුණාත්මක ස්වාභාවික රබර් වර්ගයක් ලෙස සැලකේ. එය වෛද්‍ය උපකරණ ඇතුළු ඉහළ ගුණාත්මකභාවයක් අවශ්‍ය නිෂ්පාදන සඳහා භාවිත කෙරේ.
1952දී ශ්‍රී ලංකාව සහ චීනය අතර අත්සන් කළ ප්‍රසිද්ධ “රබර්–සහල් ගිවිසුම” ද මෙරට රබර් කර්මාන්තයේ ඉතිහාසයේ වැදගත් සිදුවීමකි. සහල් හිඟයක් පැවති අවස්ථාවක රබර් වෙනුවෙන් සහල් ලබාගැනීමේ මෙම ගිවිසුම, රබර් වගාව ආර්ථිකයට පමණක් නොව විදේශ වෙළෙඳ සබඳතාවලටද දායක වූ ආකාරය පෙන්වා දෙයි.
1960 දශකයේ මැද භාගයේදී මෙරට රබර් නිෂ්පාදනය මෙට්‍රික් ටොන් 107,000 ඉක්මවා ගිය අතර, 2011දී එය මෙට්‍රික් ටොන් 158,000ක් දක්වා ඉහළ ගොස් තිබේ. වර්තමානයේද ශල්‍ය අත්වැසුම්, කාර්මික ටයර් සහ ඝන ටයර් ඇතුළු රබර් ආශ්‍රිත නිෂ්පාදන හරහා මෙරටට විදේශ විනිමය උපයා ගැනීමට හැකියාව ලැබී ඇත.
ග්‍රාමීය ජනතාවගේ ජීවනෝපායටත් රබර් වගාවෙන් දායකත්වයක්
රබර් කර්මාන්තය මෙරට ග්‍රාමීය ප්‍රජාවන්ගේ ජීවනෝපායටද වැදගත් දායකත්වයක් සපයයි. රබර් කිරි කපන්නන්, කුඩා වතු හිමියන් සහ වතු ආශ්‍රිත පවුල් ඇතුළු විශාල පිරිසකගේ ආදායම් මාර්ග මෙම ක්ෂේත්‍රය සමඟ බැඳී පවතී.
එමෙන්ම, ශ්‍රී ලංකාව ඝන ටයර් නිෂ්පාදනයේද වැදගත් ස්ථානයක් හිමිකරගෙන සිටින අතර, රබර් ආශ්‍රිත කර්මාන්තයේ නවෝත්පාදන සහ තාක්ෂණික දියුණුව අනාගතයේදී තවදුරටත් වර්ධනය කළ හැකි ක්ෂේත්‍ර ලෙස හඳුනාගෙන තිබේ.
ලංකා වැවිලිකරුවන්ගේ සංගමය සිය වසර 150ක උරුමය සමරන මෙම අවස්ථාවේදී, මෙතෙක් වගා නොකර අතහැර දමා ඇති ඉඩම් නැවත ඵලදායී ලෙස වගාවට යොදා ගැනීම, 2027 වන විට ජාතික රබර් අස්වැන්න ඉහළ නැංවීම සහ නව රබර් පැළ සිටුවීම වැනි අරමුණු කෙරෙහි අවධානය යොමු කර ඇත.
රබර් වගාව නොපවතින නව ප්‍රදේශවලට එය ව්‍යාප්ත කිරීම, නව තාක්ෂණය භාවිතයෙන් ඵලදායිතාව ඉහළ නැංවීම සහ ජාත්‍යන්තර අපනයන වෙළෙඳපොළ තුළ තරගකාරීත්වය පවත්වා ගැනීමද ඉදිරි සැලසුම් අතර වේ.
ශ්‍රී ලංකාවේ රබර් කර්මාන්තයට වසර 150ක් සපිරීම, අතීතයේ ලැබූ ජයග්‍රහණ ඇගයීමට පමණක් නොව, නව අභියෝග හඳුනාගෙන අනාගතය සඳහා ස්ථාවර සංවර්ධන සැලැස්මක් සකස් කිරීමටද අවස්ථාවක් බව වැවිලි ක්ෂේත්‍රයේ නියෝජිතයෝ පෙන්වා දෙති.
