ශ්රී ලංකා ජාතික රෝහලේ අලුතින් පිහිටුවන ලද හෘද කැතිටර්කරණ රසායනාගාර (Cath Lab) ද්විත්වය සහ නවීකරණය කරන ලද හෘද රෝග සායන ඒකකය අද (02) පස්වරුවේ රෝගී ප්රතිකාර සේවා සඳහා නිල වශයෙන් එක් කෙරිණි. රුපියල් මිලියන 600කට අධික ආයෝජනයකින් ස්ථාපිත කර ඇති මෙම නව ඒකක තුළ කෘතිම බුද්ධිය (AI) මත පදනම් වූ තත්කාලීන රූපකරණ තාක්ෂණය භාවිත කෙරේ. මෙහි ඇති විශේෂත්වය වන්නේ ෆ්ලුරොස්කොපි ක්රියාවලියේදී රෝගියාට ලැබෙන විකිරණ මාත්රාව සැලකිය යුතු ලෙස අවම කරමින් ඉහළ ගුණාත්මක රූප ලබා ගැනීමට හැකි වීමයි.
සෞඛ්ය අමාත්යවරයා මෙම අවස්ථාවේදී අදහස් දක්වමින් සඳහන් කළේ, නිදහස් සෞඛ්ය සේවාව ජාත්යන්තර ප්රමිතීන්ට අනුකූලව නවීන තාක්ෂණයෙන් සවිබල ගැන්වීමේ වැඩපිළිවෙළ යටතේ පසුගිය දින කිහිපය තුළ පමණක් දිවයිනේ රජයේ රෝහල්වලට රුපියල් මිලියන 1200ක වියදමින් නව කැත් රසායනාගාර 4ක් එක් කර ඇති බවයි. ඒ අනුව යාපනය ශික්ෂණ රෝහලේ සහ කළුබෝවිල දකුණු කොළඹ ශික්ෂණ රෝහලේ ද නව ඒකක මේ වන විට ක්රියාත්මක වේ.
ජාතික රෝහලේ සමස්ත කැත් රසායනාගාර සංඛ්යාව මේ සමඟ තුන දක්වා ඉහළ යන අතර, ඒ හරහා දිනකට රෝගීන් 45 දෙනෙකුට පමණ ප්රතිකාර ලබා දීමට හැකි වනු ඇත. දැනට දිවයින පුරා පවතින කැත් රසායනාගාර 10ක සංඛ්යාව ඉදිරියේදී 26 දක්වා ඉහළ නැංවීමට සැලසුම් කර ඇති බවත්, එමගින් වසරක පමණ කාලයක් පවතින හෘද රෝග පොරොත්තු ලේඛන මාසයක් දක්වා අවම කිරීමට අපේක්ෂා කරන බවත් අමාත්යවරයා පැවසීය.
එමෙන්ම 2029 සැප්තැම්බර් මස වන විට ජාතික රෝහල තුළ මහල් 16කින් යුත් ‘ජාතික හෘද ප්රතිකාර මධ්යස්ථානයක්’ විවෘත කිරීමට සැලසුම් කර ඇති බවත්, ඒ සඳහා රුපියල් බිලියන 12ක් වෙන් කර ඇති බවත් අමාත්යවරයා වැඩිදුරටත් කියා සිටියේය.
