සෞඛ්ය හා ජනමාධ්ය අමාත්යාංශය විසින් දිවයින පුරා ක්රියාත්මක කිරීමට නියමිත විශේෂ මදුරු මර්දන ජාතික වැඩසටහනක් ප්රකාශයට පත් කර තිබේ. ඒ අනුව ජූනි මස 08, 09 සහ 10 යන දින තුන විශේෂ මදුරු මර්දන දින ලෙස නම් කර ඇති අතර, මෙම වැඩසටහන දිස්ත්රික්ක 14ක පිහිටි අධි අවදානම් සහිත සෞඛ්ය වෛද්ය නිලධාරී කොට්ඨාස 74ක් ආවරණය වන පරිදි ක්රියාත්මක කිරීමට සැලසුම් කර ඇත.
මෙම වැඩසටහනේ ප්රධාන අරමුණ වනුයේ ඩෙංගු රෝග ව්යාප්තිය පාලනය කිරීමයි. මෙවර ඩෙංගු රෝගී තත්ත්වය වසර පුරා වර්ධනයක් පෙන්නුම් කරන බව පෙන්වා දෙන ජාතික ඩෙංගු මර්දන ඒකකය, 2026 වසරේ මේ දක්වා කාලය තුළ රෝගීන් 35,300කට අධික සංඛ්යාවක් වාර්තා වී ඇති බව ද වාර්තා කරයි. ඉන් 50%ක ප්රමාණයක් බස්නාහිර පළාතෙන් වාර්තා වීම විශේෂත්වයකි. පසුගිය ස්වභාවික ව්යසනයන් සහ පවතින වැසි සහිත කාලගුණ තත්ත්වය මෙම රෝගී වර්ධනයට ප්රධාන හේතු වී ඇත.
එමෙන්ම, පසුගිය වෙසක් උත්සව සමයේ රිය අනතුරු සහ දියේ ගිලීම් අනතුරුවල වැඩිවීමක් දැකගත හැකි වූ බව සෞඛ්ය අමාත්යාංශයේ බෝ නොවන රෝග ඒකකයේ විශේෂඥ වෛද්ය සමිත සිරිතුංග මහතා සඳහන් කළේය. දීර්ඝ නිවාඩු කාල සීමාවන් තුළ මාර්ග තදබදය ඉහළ යාම සහ දන්සල් ආශ්රිතව ඇති වූ තදබදය වැනි සාධක අනතුරු සඳහා හේතු වී ඇති බව ඔහු වැඩිදුරටත් පැවසීය.
ජනතාවගෙන් ඉල්ලා සිටින්නේ මෙම මදුරු මර්දන දින තුන තුළ තම නිවෙස්, සේවා ස්ථාන සහ අවට පරිසරය මදුරුවන් බෝවන ස්ථානවලින් තොරව පිරිසිදුව තබා ගැනීමට උපරිම සහයෝගය ලබා දෙන ලෙසයි. පිරිසිදු නොකරන ස්ථානවල හිමිකරුවන්ට එරෙහිව රතු නිවේදන නිකුත් කිරීම සහ නීතිය ක්රියාත්මක කිරීමට පොලිසියේ සහ ත්රිවිධ හමුදාවේ සහාය ලබා ගැනීමට ද සෞඛ්ය අංශ තීරණය කර ඇත.
