න්යෂ්ටික ආරක්ෂාව සහ සුරක්ෂිතභාවය පිළිබඳ ජාත්යන්තර ප්රමිතීන් අඛණ්ඩව පවත්වා ගැනීමට ශ්රී ලංකාව දැඩි කැපවීමකින් කටයුතු කරන බව විද්යා හා තාක්ෂණ අමාත්ය මහාචාර්ය ක්රිෂාන්ත අබේසේන මහතා පවසයි. ශ්රී ලංකා පරමාණුක බලශක්ති නියාමන සභාව සහ ජාත්යන්තර පරමාණුක බලශක්ති ඒජන්සිය (IAEA) එක්ව සංවිධානය කරන ලද “න්යෂ්ටික අධිකරණ වෛද්ය විද්යාව පිළිබඳ මූලික හැඳින්වීමේ කලාපීය පුහුණු වැඩමුළුව” කොළඹදී ආරම්භ කරමින් අමාත්යවරයා මේ බව ප්රකාශ කළේය.
ජූලි 17 වැනිදා දක්වා පැවැත්වෙන මෙම පුහුණු වැඩසටහන, ඒකාබද්ධ න්යෂ්ටික ආරක්ෂක තිරසර සැලැස්ම (INSSP) ක්රියාත්මක කිරීමේ ප්රතිඵලයක් ලෙස සංවිධානය කර ඇත. විකිරණශීලී ද්රව්ය සම්බන්ධයෙන් ඉස්මතු විය හැකි තර්ජනවලට සාර්ථකව මුහුණ දීම සඳහා ජාතික සහ කලාපීය හැකියාවන් ඉහළ නැංවීම මෙම වැඩසටහනේ ප්රධාන අරමුණයි.
මෙම පුහුණුව මගින් විශේෂ අවධානය යොමු කරන කරුණු:
න්යෂ්ටික හෝ වෙනත් විකිරණශීලී ද්රව්ය භාවිත කරමින් සිදුවන අපරාධමය හෝ අනවසර ක්රියාවන්ට මුහුණ දීම සඳහා ජාතික ප්රතිචාර රාමුවකදී න්යෂ්ටික අධිකරණ වෛද්ය විද්යාවේ කාර්යභාරය.
විමර්ශන තාක්ෂණයන් සහ ආයතන අතර සම්බන්ධීකරණය වර්ධනය කිරීම.
න්යෂ්ටික ද්රව්ය සම්බන්ධ සිද්ධීන් විමර්ශනය කිරීම, මූලාශ්ර හඳුනාගැනීම සහ නීතිය ක්රියාත්මක කරන ආයතනවලට සහාය වීම.
අමාත්ය මහාචාර්ය ක්රිෂාන්ත අබේසේන මහතා වැඩිදුරටත් අවධාරණය කළේ, වර්තමාන ලෝකයේ න්යෂ්ටික හා විකිරණශීලී ද්රව්යවල අනවසර භාවිතය සම්බන්ධ අවදානම් පවතින බැවින් මෙවැනි විද්යාත්මක පරීක්ෂණ ක්ෂේත්රය අතිශයින් තීරණාත්මක බවයි. මෙම අවස්ථාව සඳහා මැලේසියාව, ඉන්දුනීසියාව, තායිලන්තය, මියන්මාරය, මොන්ගෝලියාව, වියට්නාමය සහ ශ්රී ලංකාව නියෝජනය කරමින් ජාත්යන්තර නියෝජිතයින් සහ විශේෂඥයින් පිරිසක් සහභාගී වී සිටිති.
