ශ්රී ලංකා ජාතික ඔලිම්පික් කමිටුවේ නව නිලධාරී මණ්ඩලය තේරී පත් කර ගැනීම සඳහා වන නිලවරණය අද පස්වරුවේ කොළඹ පිහිටි එම කමිටු මූලස්ථානයේදී පැවැත්වීමට නියමිතව තිබේ. මෙවර නිලවරණය සුවිශේෂී වන්නේ සභාපති ධුරය සඳහා ප්රබල අපේක්ෂකයින් පස් දෙනෙකු තරඟ වැදීම හේතුවෙන් ඉතා තියුණු මුහුණුවරක් ගෙන තිබීමයි. ක්රීඩා සංගම් ආරංචි මාර්ගවලට අනුව පාපන්දු සම්මේලනයේ සභාපති ජස්වර් උමාර්, බේස්බෝල් සංගමයේ සභාපති අසංග සෙනෙවිරත්න සහ ඉලක්කයට වෙඩි තැබීමේ සම්මේලනය නියෝජනය කරන ශිරන්ත පීරිස් යන මහත්වරුන් මෙම සභාපති ධුර සටනේ පෙරමුණේ පසුවෙති.
මෙම නිලවරණයේදී ඡන්දය ප්රකාශ කිරීම සඳහා පිළිගත් ක්රීඩා සංගම් 28කට සහ ක්රීඩක කමිටුව නියෝජනය කරන නියෝජිතයන් දෙදෙනෙකුට අවස්ථාව හිමි වන අතර ඒ අනුව භාවිත කිරීමට නියමිත මුළු ඡන්ද සංඛ්යාව 30කි. ඉදිරි වසර හතරක කාලය සඳහා මෙරට ඔලිම්පික් ක්රීඩා පරිපාලනය මෙහෙයවන කණ්ඩායම කවුරුන්ද යන්න තීරණය වන මෙම මැතිවරණය මෙරට ක්රීඩා ක්ෂේත්රයේ අනාගත ගමන්මග කෙරෙහි තීරණාත්මක බලපෑමක් එල්ල කරනු ඇතැයි අපේක්ෂා කෙරේ.
