පළාත් සභා මැතිවරණ නීති සංශෝධනය කිරීම සඳහා පත් කර ඇති තේරීම් කාරක සභාව හරහා රජය කාලය නාස්ති නොකළ යුතු බව සමගි ජන බලවේගය (SJB), ඉලංගෙයි තමිල් අරසු පක්ෂය (ITAK) සහ ශ්රී ලංකා මුස්ලිම් කොංග්රසය (SLMC) අද (11) රජයට අවධාරණය කළේය. කොළඹ පිහිටි විපක්ෂ නායක කාර්යාලයේ පැවති මාධ්ය හමුවකට එක්වෙමින් විපක්ෂයේ දේශපාලන පක්ෂ නියෝජිතයන් මෙම අදහස් පළ කළහ.
මෙහිදී අදහස් දැක්වූ සමගි ජන බලවේගයේ මහලේකම් රංජිත් මද්දුම බණ්ඩාර මහතා කියා සිටියේ ජනතා විමුක්ති පෙරමුණ ප්රමුඛ වත්මන් රජය, පළාත් සභා ක්රමයට එරෙහිව සිය මුල්කාලීන ස්ථාවරයට යළි ගමන් කරමින් මැතිවරණය පැවැත්වීම මඟහරිමින් සිටින බවයි. තේරීම් කාරක සභා පත් කරමින් කාලය නාස්ති නොකර මැතිවරණය සම්බන්ධයෙන් රජය පැහැදිලි ස්ථාවරයක් ඉදිරිපත් කළ යුතු බව පාර්ලිමේන්තු මන්ත්රී ශානක්කියන් රාසමානික්කම් මහතා මෙහිදී ප්රකාශ කළේය.
පසුගිය මාර්තු මාසයේදී පත් කරන ලද මෙම තේරීම් කාරක සභාව මාස තුනක් ඇතුළත වාර්තාවක් ඉදිරිපත් කළ යුතු බැවින්, එළඹෙන මැයි 22 වැනිදා ඒ සම්බන්ධයෙන් යම් තීරණයක් ලැබෙනු ඇතැයි තමන් බලාපොරොත්තු වන බව මුස්ලිම් කොංග්රසයේ මහලේකම් නිසාම් කාරියප්පර් මහතා සඳහන් කළේය. ඉන්දියාව තුළ බලය විමධ්යගත කිරීම සාර්ථකව ක්රියාත්මක වුවද ශ්රී ලංකාව තුළ එය නිසි ලෙස ඉටු නොවන බව ද රංජිත් මද්දුම බණ්ඩාර මහතා වැඩිදුරටත් කියා සිටියේය.
