පුරවැසියන් වෙනුවෙන් ප්රාථමික සෞඛ්ය සේවා වඩාත් ප්රශස්ත මට්ටමින් ළඟා කරදීම වෙනුවෙන් දිවයින පුරා “ආරෝග්යා” සුවතා මධ්යස්ථාන (Health & Wellness Centres) 1000ක් පිහිටුවීමේ විශේෂ ව්යාපෘතියක් සෞඛ්ය හා ජනමාධ්ය අමාත්යාංශය මඟින් ක්රියාවට නැංවා තිබේ. සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ උපදෙස් මත “සුවපත් රටක් උදෙසා” (HEALTHY SRI LANKA) ජාතික වැඩපිළිවෙළ යටතේ මෙම වැඩසටහන ක්රියාත්මක වේ.
ආසන්න වශයෙන් 10,000ක ජනගහනයක් ඉලක්ක කර ගනිමින් ස්ථාපිත කෙරෙන මෙම සෑම මධ්යස්ථානයක් සඳහාම පවුලේ වෛද්යවරයෙක්, ප්රජා සෞඛ්ය හෙද නිලධාරියෙක්, මහජන සෞඛ්ය පරීක්ෂකවරයෙක්, පවුල් සෞඛ්ය සේවා නිලධාරිනියක්, ඖෂධවේදියෙක් ඇතුළු 8 දෙනෙකුගෙන් යුත් බහුවිධ සෞඛ්ය කණ්ඩායමක් අනුයුක්ත කිරීමට නියමිතය. ඒ වෙනුවෙන් අවශ්ය සෞඛ්ය කණ්ඩායම් බඳවා ගැනීමට අදාළ අමාත්ය මණ්ඩල පත්රිකාව ද මේ වන විට යොමු කර තිබේ.
මෙම ව්යාපෘතිය සඳහා මෙවර අයවැයෙන් රුපියල් මිලියන 1,500ක ප්රතිපාදන වෙන් කර ඇත. ව්යාපෘතියේ පළමු අදියර යටතේ මාපලගම, ඇත්ඔය, තල්පිටිය, පොල්ගොල්ලවත්ත සහ ගන්කන්ද යන ප්රදේශවල නියමු මධ්යස්ථාන 5ක් සාර්ථකව ස්ථාපිත කෙරුණු අතර, දෙවන අදියර යටතේ මේ වන විට දිස්ත්රික්ක 21ක් ආවරණය වන පරිදි සුවතා මධ්යස්ථාන 42ක් ජනතා අයිතියට පත් කර සක්රීයව ක්රියාත්මක වේ. මෙම වසර තුළ මධ්යස්ථාන සංඛ්යාව 300 දක්වා ඉහළ නැංවීමට කටයුතු කෙරෙන අතර, 2028 වසර අවසන් වන විට දිවයින පුරා මධ්යස්ථාන 1,000ක් දක්වා එය වර්ධනය කිරීම අමාත්යාංශයේ ප්රමුඛ ඉලක්කයයි.
මෙම මධ්යස්ථාන හරහා බෝ නොවන රෝග වැළැක්වීම සහ පාලනය, පිළිකා කල්තියා හඳුනා ගැනීම, සුළු ශල්ය වෛද්ය ප්රතිකාර, වැඩිහිටි හා යොවුන් සෞඛ්ය සේවා, මානසික සෞඛ්ය සත්කාර, මධ්යසාර හා මත්ද්රව්ය පුනරුත්ථාපන උපදේශන මෙන්ම තෝරාගත් රසායනාගාර පරීක්ෂණ රැසක් ග්රාමීය මට්ටමින් ජනතාවට නොමිලේ සැපයීමට නියමිතය. මීට අමතරව, මූලික වෛද්ය පරීක්ෂණ රැසක් එකවර සිදු කළ හැකි අතිනවීන ඒකාබද්ධ වෛද්ය උපකරණයක් (Multi-functional Device) ඉදිරියේදී මෙම මධ්යස්ථාන වෙත හඳුන්වා දීමට ද කටයුතු යොදමින් පවතී.
