2022 වසරේ විෂ වර්ග, මත්ද්රව්ය හා අබිං පනතට ගෙන එන ලද සංශෝධන බන්ධනාගාර තදබදයට ප්රධාන හේතුවක් වී ඇති බවත්, එම තත්ත්වය සමනය කිරීම සඳහා අදාළ සංශෝධන වහාම වෙනස් කිරීමට කටයුතු කරමින් පවතින බවත් අධිකරණ ඇමැති හර්ෂණ නානායක්කාර මහතා පවසයි.
මේ සම්බන්ධයෙන් අදහස් දක්වමින් හිටපු අධිකරණ ඇමැති අලි සබ්රි මහතා සහ වත්මන් අධිකරණ ඇමැතිවරයා පෙන්වා දී ඇත්තේ මෙම නීතිමය රාමුව තුළ පවතින ගැටලුකාරී තත්ත්වයන් නිසා සුළු මත්ද්රව්ය ප්රමාණයක් සන්තකයේ තබාගන්නා සැකකරුවන්ට පවා දීර්ඝ කාලයක් රක්ෂිත බන්ධනාගාරගතව සිටීමට සිදුව ඇති බවයි.
පවතින ගැටලු සහ යෝජිත විසඳුම් අනුව, දැනට පවතින නීතිය යටතේ ග්රෑම් 2කට වැඩි මත්ද්රව්ය නඩු සඳහා මහාධිකරණයෙන් ඇප ලබාදීමේ හැකියාව සීමා වී ඇති අතර, ඒ සඳහා අභියාචනාධිකරණය වෙත යොමුවීමට සිදුවීම නිසා සැකකරුවන්ට දැඩි අසීරුතාවන්ට මුහුණ දීමට සිදුවේ. නඩු කටයුතු සඳහා රසපරීක්ෂක වාර්තා අත්යවශ්ය වන නමුත්, එම වාර්තා ලබාගැනීමට වසරකට වැඩි කාලයක් ගත වීම නිසා නීතිමය ක්රියාදාමය දීර්ඝ වී ඇත. දැනට පවතින පුරප්පාඩු පිරවීම සහ වාර්තා කඩිනම් කිරීම සඳහා වැඩපිළිවෙළක් ක්රියාත්මක වෙමින් පවතී.
ග්රෑම් 5ක් දක්වා අඩු මත්ද්රව්ය ප්රමාණයක් සඳහා මහෙස්ත්රාත් අධිකරණයෙන් ඇප ලබාගත හැකි වන පරිදි නීතිය සංශෝධනය කිරීමට සැලසුම් කර ඇත. මීට අමතරව ශුද්ධ බර වෙනුවට දළ බර පදනම් කරගෙන නඩු ගොනු කිරීමේ හැකියාව සලකා බලමින් පවතී. තවද, බන්ධනාගාර තදබදය අවම කිරීම සඳහා මත්ද්රව්යවලට ඇබ්බැහි වූවන් හුදෙක් සිරගත කිරීම වෙනුවට පුනරුත්ථාපනය කිරීම කෙරෙහි වැඩි අවධානයක් යොමු කළ යුතු බවට අදහස් පළ වේ.
