ශ්රී ලංකා මහ බැංකුව විසින් නිකුත් කරන ලද නවතම මිලදී ගැනීමේ කළමනාකරුවන්ගේ දර්ශකයට (PMI) අනුව, 2026 මැයි මාසයේදී ශ්රී ලංකාවේ නිෂ්පාදන සහ සේවා අංශවල අඛණ්ඩ වර්ධනයක් වාර්තා වී තිබේ.
නිෂ්පාදන අංශයේ PMI දර්ශකය මැයි මාසයේදී 56.6ක් දක්වා ඉහළ ගොස් ඇති අතර, එය කාර්මික ක්රියාකාරකම්වල මාසික වර්ධනයක් පෙන්නුම් කරයි. මැද පෙරදිග පවතින ගැටුම් ඇතුළු ගෝලීය භූ දේශපාලනික ආතතීන් මධ්යයේ වුවද, සියලුම උප දර්ශක මධ්යස්ථ මට්ටමට වඩා ඉහළින් පැවතීම නිසා මෙම වර්ධනය සිදුව ඇති බව මහ බැංකුව පවසයි. නිෂ්පාදන අංශයේ වර්ධනයට ප්රධාන හේතු වී ඇත්තේ ආහාර සහ බීම වර්ග මෙන්ම රෙදිපිළි සහ ඇඟලුම් අංශවල නව ඇණවුම් සහ නිෂ්පාදනය ඉහළ යාමයි. අප්රේල් මාසයට සාපේක්ෂව මැයි මාසයේ වැඩ කරන දින ගණන වැඩි වීම නිසා නිෂ්පාදනය ඉහළ යාමත්, ඉල්ලුම සහ නිෂ්පාදන මට්ටම් ඉහළ යාම සමඟ මිලදී ගැනීම් සඳහා වූ තොග ඉහළ යාමත් ඊට දායක වී ඇත.
සේවා අංශයේ PMI දර්ශකය මැයි මාසයේදී 56.9ක් ලෙස වාර්තා වී ඇති අතර, එය පෙර මාසයේ පැවති පසුබෑමකින් පසු යථා තත්ත්වයට පත්වීමක් පෙන්නුම් කරයි. මූල්ය, වෘත්තීය සහ වෙනත් පෞද්ගලික සේවාවන්හි කැපී පෙනෙන වර්ධනයක් වාර්තා වීම මෙන්ම නිශ්චල දේපළ, තොරතුරු තාක්ෂණ ක්රමලේඛන සහ භාණ්ඩ ප්රවාහන අංශවල ද වර්ධනයක් දැකගත හැකි වීම මෙම වර්ධනයට ප්රධාන හේතු වී ඇත. විශේෂයෙන්ම මූල්ය සහ වෘත්තීය සේවාවන්හි නව ව්යාපාරික කටයුතු ඉහළ යාම සහ තොග සහ සිල්ලර වෙළඳාම මෙන්ම සැපයුම් දාම සේවාවන්හි දායකත්වය ද ඊට බලපා ඇත.
ඉදිරි මාස තුන සම්බන්ධයෙන් ව්යාපාරික අපේක්ෂාවන් ධනාත්මකව පවතින බව මහ බැංකුව සඳහන් කරයි. විශේෂයෙන්ම ඉදිරියේදී පැවැත්වීමට නියමිත පෙරහැර සමයත් සමඟ සංචාරක පැමිණීම් වැඩි වනු ඇතැයි අපේක්ෂා කරන අතර, දේශීය ආර්ථික තත්ත්වයන් ද දියුණු වෙමින් පවතින බව මහ බැංකුව පවසයි.
