ශ්රී ලංකා පොලීසියේ 160 වැනි සංවත්සරය නිමිත්තෙන් ‘දේශසීමා ඉක්මවා යන අපරාධ සහ සමාජ ආරක්ෂණය’ (Transnational Crime and Social Protection) පිළිබඳ ප්රථම ජාත්යන්තර සමුළුව අගෝස්තු 31 සහ සැප්තැම්බර් 01 යන දිනවලදී පැවැත්වීමට කටයුතු යොදා ඇත. සහකාර පොලිස් අධිකාරි එෆ්. වුඩ්ලර් සඳහන් කළේ ශ්රී ලංකා පොලීසිය ජාත්යන්තර මට්ටමේ නූතන දැනුම සහ ප්රායෝගික අත්දැකීම් හුවමාරු කරගැනීම සඳහා මෙම පියවර ගත් බවයි.
කටාන ජාතික පොලිස් ඇකඩමිය (National Police Academy) මඟින් මෙහෙයවන මෙම සමුළුවේදී සයිබර් අපරාධ, මිනිස් ජාවාරම්, ජාත්යන්තර මත්ද්රව්ය ජාල, මූල්ය වංචා, ළමා ආරක්ෂණය, මානව හිමිකම් සහ මුදල් විශුද්ධිකරණය වැනි කාලීන මාතෘකා රැසක් යටතේ පුළුල් ලෙස සාකච්ඡා කිරීමට නියමිතය. නීතිය ක්රියාත්මක කරන නිලධාරීන්ට අමතරව විශ්වවිද්යාල සිසුන්, විද්වතුන් සහ පර්යේෂකයන්ට ද තමන්ගේ පර්යේෂණ පත්රිකා (Abstracts) මේ සඳහා ඉදිරිපත් කිරීමට අවස්ථාව සලසා දී ඇත. න්යායාත්මක සහ ප්රායෝගික අත්දැකීම් එක්තැන් කෙරෙන මෙම සමුළුව පිළිබඳ වැඩිදුර තොරතුරු කටාන ජාතික පොලිස් ඇකඩමියෙන් ලබාගත හැක.
