ශ්රී ලංකා පොලිස් දෙපාර්තමේන්තුවේ පවතින දැඩි නිලධාරී හිඟය පියවීම සඳහා අලුතින් නිලධාරීන් 10,000ක් බඳවා ගැනීමට රජයේ අනුමැතිය හිමිව තිබේ. පොලිස්පති නීතිඥ ප්රියන්ත වීරසූරිය මහතා මහනුවරදී මාධ්ය වෙත අදහස් දක්වමින් ප්රකාශ කළේ මේ වන විටත් ඊට අදාළ මූලික කටයුතු ආරම්භ කර ඇති බවයි.
මෙම බඳවා ගැනීමේ වැඩපිළිවෙළ යටතේ උප පොලිස් පරීක්ෂකවරුන් 1,000ක් පමණ මේ මාසය අවසන් වීමට ප්රථම බඳවා ගැනීමට සැලසුම් කර ඇති අතර, පොලිස් කොස්තාපල්වරුන් 2,500ක් බඳවා ගැනීම සඳහා වූ ගැසට් පත්රය ද මේ වන විට නිකුත් කර ඇත.
පොලිස්පතිවරයා පෙන්වා දුන්නේ සමස්තයක් ලෙස පොලිස් දෙපාර්තමේන්තුවේ නිලධාරීන් 40,000ක පමණ හිඟයක් පවතින බවයි. ගතවූ මාස තුනක කාලය තුළ පමණක් නිලධාරීන් 1,200ක් විශ්රාම ලබා ඇති අතර, තවත් පිරිසක් පෞද්ගලික හේතු සහ අසනීප තත්ත්වයන් මත විශ්රාම යමින් සිටිති.
පවතින හිඟයට තාවකාලික පිළියමක් ලෙස සිවිල් ආරක්ෂක බලකායේ සාමාජිකයන් 6,000ක් මේ වන විටත් පොලිස් ස්ථාන වෙත අනුයුක්ත කර ඇති අතර, ඉදිරියේදී තවත් 4,000ත් 5,000ත් අතර පිරිසක් අනුයුක්ත කිරීමට රජය සැලසුම් කර තිබේ.
සහකාර පොලිස් අධිකාරී (ASP) තනතුර සඳහා දැනට සේවයේ නිරත නිලධාරීන් අතරින් 191 දෙනෙකු බඳවා ගැනීමට නියමිත බව පොලිස්පතිවරයා ප්රකාශ කළේය. මීට අමතරව, අවශ්ය සේවා කාලය සම්පූර්ණ කළ තවත් නිලධාරීන් 141 දෙනෙකු එම තනතුරට උසස් කිරීම සඳහා වූ අනුමැතියට යොමු කර ඇති බව ද ඔහු වැඩිදුරටත් සඳහන් කළේය.
මෙම බඳවා ගැනීම් හරහා ඉදිරියේදී පොලිස් දෙපාර්තමේන්තුවේ කටයුතු වඩාත් කාර්යක්ෂම කිරීමට සහ මහජන ආරක්ෂාව තහවුරු කිරීමට අපේක්ෂිතය.
