ශ්රී ලංකාවට අලුතින් පත්ව ආ නව තානාපතිවරු සිව් දෙනෙකු සහ මහ කොමසාරිස්වරු දෙදෙනෙකු අද (අප්රේල් 20) පෙරවරුවේ ජනාධිපති කාර්යාලයේදී ජනාධිපති අනුර කුමාර දිසානායක මහතා වෙත සිය අක්තපත්ර නිල වශයෙන් භාර දුන්හ.
අක්තපත්ර භාර දුන් පිරිස අතර නවදිල්ලියේ නේවාසිකව සේවය කරන පැපුවා නිව්ගිනියා මහකොමසාරිස් වින්සන්ට් සුමාලේ, සෝමාලියානු තානාපති අබ්දුල්ලාහි මොහොමඩ් ඔඩෝවා සහ ලක්සම්බර්ග් තානාපති ක්රිස්ටියන් බීවර් යන මහත්වරුන් ඇතුළත් වේ. මීට අමතරව වතිකානයේ අපෝස්තලික තානාපති මොන්සිඤ්ඤෝර් ඇන්ඩ්රෙජ් ජොස්වොවිච් පියතුමා, පාකිස්ථාන මහකොමසාරිස් මේජර් ජෙනරාල් (විශ්රාමික) නයියාර් නසීර් සහ කුවේට් රාජ්යයේ තානාපති සාලේ මුබාරක් අල් සරාවි යන මහත්වරු ද ජනාධිපතිවරයා වෙත සිය අක්තපත්ර භාර දුන්හ.
අක්තපත්ර පිළිගැනීමෙන් අනතුරුව ජනාධිපතිවරයා ඔවුන් සමඟ සුහද සාකච්ඡාවක නිරත වූ අතර, මෙම අවස්ථාවට විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා සහ ජනාධිපති ලේකම් ආචාර්ය නන්දික සනත් කුමානායක මහතා ද සහභාගී වූහ.
