මෑතකදී පැවැත්වූ “සාම පා ගමන” සම්බන්ධයෙන් සිය විවේචනය ඉදිරිපත් කරමින් පූජ්ය බලංගොඩ කස්සප හිමියන් අද (අප්රේල් 20) පැවැති මාධ්ය හමුවකදී අදහස් ප්රකාශ කළහ. ලංකාවේ ථේරවාද බෞද්ධ සම්ප්රදාය ආරක්ෂා වන පරිදි මෙවැනි වැඩසටහන් සංවිධානය විය යුතු බව උන්වහන්සේ මෙහිදී අවධාරණය කළහ.
සාම පා ගමනක් පැවැත්වීම පිළිබඳ ගැටලුවක් නොමැති වුවත්, එය මෙරට ථේරවාද බෞද්ධ සම්ප්රදායට අනුකූලව සිදුකළ යුතුව තිබූ බව උන්වහන්සේ පෙන්වා දුන්හ. බෞද්ධ ප්රබෝධයක් ඇති කිරීම සඳහා මෙම පා ගමන බෞද්ධයන් හීන උතුරු හා නැගෙනහිර පළාත් ද ආවරණය වන පරිදි පැවැත්විය යුතුව තිබූ බව උන්වහන්සේගේ අදහසයි.
විශේෂයෙන්ම, තිරිසන් සතුන් සමඟ පා ගමන් යාම බෞද්ධ ඉතිහාසයේ කොතැනකවත් අසා නොමැති බවත්, සතුන්ට සිවුරු පෙරවීම කිසිසේත්ම අනුමත කළ නොහැකි බවත් උන්වහන්සේ පැවසූහ. එවැනි ක්රියාවන් මගින් බුද්ධ චීවරයේ ඇති පූජනීයත්වය සහ වටිනාකම හෑල්ලු වන බව පූජ්ය බලංගොඩ කස්සප හිමියන් වැඩිදුරටත් අවධාරණය කළහ.
