දිස්ත්‍රික් කමිටු රැස්වීම්වලදී ඉදිරිපත් වන කඩිනම් ජනතා අවශ්‍යතාවලට ප්‍රමුඛතාව ලබා දෙමින් ග්‍රාමීය මාර්ග සංවර්ධන කටයුතු ක්‍රියාත්මක කරන ලෙසත්, ආර්ථික ගැටලුකාරී තත්ත්වය හමුවේ 2022 වසරේදී නවතා දමන ලද සියලු මාර්ග සංවර්ධන ව්‍යාපෘති යළි ආරම්භ කර නිසි කලට අවසන් කරන ලෙසත් ජනාධිපති අනුර කුමාර දිසානායක මහතා මහාමාර්ග අමාත්‍යාංශයේ නිලධාරීන්ට උපදෙස් දී තිබේ.
මහාමාර්ග අමාත්‍යාංශයෙන් 2026 වසරේදී ක්‍රියාත්මක කරනු ලබන ව්‍යාපෘතිවල ප්‍රගති සමාලෝචනයට සහ 2027 පූර්ව අය-වැය සාකච්ඡාවට ජනාධිපති කාර්යාලයේදී එක්වෙමින් ජනාධිපතිවරයා මෙම උපදෙස් ලබා දී ඇත. මධ්‍යම අධිවේගී මාර්ගයේ කඩවත – මීරිගම දක්වා කොටස, වරාය පිවිසුම් මාර්ගයේ ඉදිකිරීම්, කුරුණෑගල – ගලේவெල මාර්ගය සහ රුවන්පුර අධිවේගී මාර්ගයේ සැලසුම් මෙන්ම මධ්‍යම අධිවේගී මාර්ගයේ 3 වැනි අදියර යටතේ ක්‍රියාත්මක පොතුහැර – ගලගෙදර දක්වා කොටස ඇතුළු ව්‍යාපෘතිවල වත්මන් තත්ත්වය මෙහිදී දීර්ඝ ලෙස සමාලෝචනය කෙරිණි.
මෙහිදී අනාවරණය වූ කරුණු කිහිපයක් ලෙස, වසර 15ක කාලයක් තුළ කිසිදු ප්‍රතිසංස්කරණයකට ලක් නොකළ ප්‍රධාන (A සහ B) මාර්ග 130ක් පමණ ඇති බව හඳුනාගෙන ඇත. මාර්ග තදබදය පාලනය කිරීම සහ විනයගරුක මාර්ග සංස්කෘතියක් ඇති කිරීම අරමුණු කරගනිමින්, පොලිසිය, මාර්ග ආරක්ෂණ අංශ සහ මාර්ග කළමනාකරණ අංශ ඒකාබද්ධ වූ ‘ස්මාර්ට් මාර්ග සංඥා සහ කැමරා පද්ධතියක්’ (National Traffic Database) ක්‍රියාත්මක කිරීමට නියමිතය. මහාමාර්ග අමාත්‍යාංශය වෙනුවෙන් 2026 අය-වැයෙන් සහ දිට්වා ආපදා තත්ත්වය හමුවේ වෙන් කෙරුණු රුපියල් බිලියන 402ක ප්‍රතිපාදන යටතේ ක්‍රියාත්මක ව්‍යාපෘතිවල ප්‍රගතිය පුළුල් ලෙස විමසා බලන ලදී. මීට අමතරව, මාර්ග සංවර්ධන ව්‍යාපෘති ක්‍රමානුකූලව දිස්ත්‍රික් මට්ටමින් ක්‍රියාත්මක කිරීමට අවස්ථාව ලබාදීමේ වැදගත්කම සහ කුඩා මාර්ග සංවර්ධනය කිරීමේ වගකීම අදියර වශයෙන් දිස්ත්‍රික් ලේකම්වරුන් වෙත පැවරීම සම්බන්ධයෙන්ද සාකච්ඡා විය.
ප්‍රවාහන, මහාමාර්ග සහ නාගරික සංවර්ධන ඇමැති බිමල් රත්නායක, නියෝජ්‍ය ඇමැතිවරුන් වන ආචාර්ය අනිල් ජයන්ත ප්‍රනාන්දු, ප්‍රසන්න ගුණසේන, එරංග ගුණසේකර යන මහත්වරුන් ඇතුළු අමාත්‍යාංශ ලේකම්වරුන් සහ රාජ්‍ය නිලධාරීහු පිරිසක් මෙම අවස්ථාවට එක්ව සිටියහ.
