සිංගප්පූරුවේ Chinese Swimming Club හිදී පැවති ‘Future Ready: A Focus on AI, Health and Science’ මැයෙන් වූ වෘත්තීයවේදීන්, ව්යවසායකයන්, විද්වතුන් සහ කර්මාන්ත අංශයේ ප්රධානීන්ගේ හමුවකදී ජාත්යන්තර කීර්තියට පත් ‘සිලෝන් ටී’ (Ceylon Tea) ප්රවර්ධනය කිරීමට ශ්රී ලංකා මහකොමසාරිස් කාර්යාලය පියවර ගත්තේය.
තාක්ෂණවේදය, කෘත්රිම බුද්ධිය, සෞඛ්ය පහසුකම් සහ නවෝත්පාදන වැනි ක්ෂේත්ර ඔස්සේ පැවති මෙම වැඩසටහනේදී, මහකොමසාරිස් සෙනරත් දිසානායක සහ අමාත්ය උපදේශක (වාණිජ) භාග්යා අබේකෝන් යන මහත්ම මහත්මීන් සක්රීයව සහභාගි වූහ. එහිදී ඔවුන් යහපත් කායික හා මානසික සෞඛ්යයක් පවත්වා ගැනීම සඳහා ප්රතිඔක්සිකාරක ගුණයෙන් යුතු තේ පානය වැදගත් වන ආකාරය පිළිබඳව පැහැදිලි කරමින් සිලෝන් ටී ප්රවර්ධනය කළහ.
මෙම හමුවේදී සහභාගි වූවන්ට සිලෝන් ටී හි රසය හා ගුණාත්මකභාවය අත්විඳීමට අවස්ථාව ලැබුණු අතර, ඔවුහු ඒ සඳහා ඉතා උණුසුම් ප්රතිචාර දැක්වූහ. සිංගප්පූරුව තුළ ශ්රී ලාංකේය නිෂ්පාදන සඳහා පවතින ඉල්ලුම වර්ධනය කිරීමේ අරමුණින් මහකොමසාරිස් කාර්යාලය ක්රියාත්මක කරන ප්රවර්ධන වැඩසටහන් මාලාවේ තවත් පියවරක් ලෙස මෙය සංවිධානය කර තිබුණි.
මෙවැනි වැඩසටහන් හරහා සිලෝන් ටී හි කීර්තිනාමය හා උරුමය ඔසවා තැබීම, අපනයන ක්ෂේත්රය සඳහා වැදගත් වන ප්රජාවන් අතර ශ්රී ලාංකේය නිෂ්පාදන ප්රචලිත කිරීම සහ ශක්තිමත් වාණිජ සම්බන්ධතා ගොඩනඟා ගැනීම අපේක්ෂා කෙරේ.
