රටේ ආබාධිත පුද්ගලයින් සඳහා රියැදුරු බලපත්‍ර ලබාගැනීමේ ක්‍රියාවලිය වඩාත් සරල හා විධිමත් කිරීම සඳහා ප්‍රධාන ප්‍රතිපත්තිමය වෙනස්කම් සහ ව්‍යවස්ථාදායක සංශෝධන කිහිපයක් විශේෂ පාර්ලිමේන්තු කමිටුවක් විසින් යෝජනා කර තිබේ. ප්‍රවාහන, මහාමාර්ග සහ නගර සංවර්ධන අමාත්‍යාංශයේ අමාත්‍යාංශ උපදේශක කමිටුව මඟින් පත් කරන ලද මෙම විශේෂ කමිටුවේ මංගල රැස්වීම මෑතකදී පාර්ලිමේන්තුවේදී පැවැත්විණි.
දෘශ්‍යාබාධිත සහ ශ්‍රව්‍යාබාධිත පුද්ගලයින් සඳහා රියැදුරු බලපත්‍ර ලබාගැනීමේ සුදුසුකම් පුළුල් කිරීම, දිස්ත්‍රික් මට්ටමින් වෛද්‍ය පරීක්ෂණ හඳුන්වා දීම සහ විශේෂ කායික අවශ්‍යතාවන්ට සරිලන පරිදි වාහන වෙනස් කිරීම සඳහා පැහැදිලි මාර්ගෝපදේශ සකස් කිරීම කෙරෙහි මෙහිදී වැඩි අවධානයක් යොමු කර තිබේ. ජාතික ගමනාගමන වෛද්‍ය ආයතනයේ (NTMI) ක්‍රියාකාරිත්වය විධිමත් කිරීම සහ අදාළ ගැසට් නිවේදන සංශෝධනය කිරීම පිළිබඳවත් මෙහිදී පුළුල් ලෙස සාකච්ඡා වී ඇත.
දෘශ්‍යාබාධිත පුද්ගලයින්ට පුළුල් පරාසයක වාහන කාණ්ඩ සඳහා ප්‍රවේශය ලබා දීම පිණිස දෘෂ්ටි ක්ෂේත්‍ර ඇගයීම් මත පදනම්ව වෛද්‍ය නිර්ණායක තක්සේරු කිරීම, අත්සන් භාෂා පරිවර්තකයින් යොදා ගැනීම, ශ්‍රව්‍යාබාධිත රියැදුරන් සඳහා විශේෂ හඳුනාගැනීමේ සලකුණු භාවිත කිරීම සහ එක් බලපත්‍රලාභියෙකුට අනුවර්තනය කරන ලද වාහන කිහිපයක් ලියාපදිංචි කිරීමට අවසර දීම ඇතුළු ප්‍රධාන යෝජනා රැසක් මෙහිදී ඉදිරිපත් කර ඇත. දැඩි මාර්ග ආරක්ෂණ ප්‍රමිතීන් අඛණ්ඩව රඳවා ගනිමින් ආබාධිත පුද්ගලයින්ගේ ගමනාගමන අයිතිවාසිකම් තහවුරු කිරීම සඳහා ජාතික ගමනාගමන වෛද්‍ය ආයතනය සහ මෝටර් රථ ප්‍රවාහන දෙපාර්තමේන්තුව සම්බන්ධ කරන ඩිජිටල් පද්ධතිය උත්ශ්‍රේණි කිරීමටද කමිටුව අවධාරණය කර තිබේ.
