2018 වසරේ සිට 2024 වසර දක්වා කාලය තුළ ශ්රී ලංකාවේ 1 සිට 10 දක්වා ශ්රේණිවල ඉගෙනුම ලැබූ සිසුන් 267,138ක් පාසල් පද්ධතියෙන් ඉවත් වී ඇති බව අග්රාමාත්ය සහ අධ්යාපන අමාත්ය ආචාර්ය හරිනි අමරසූරිය මහත්මිය ඊයේ (10) පාර්ලිමේන්තුවේදී අනාවරණය කළාය.
පාර්ලිමේන්තුවේදී මතු කරන ලද ප්රශ්නයකට පිළිතුරු දෙමින් අගමැතිනිය සඳහන් කළේ, 2010 සිට 2017 මුල් භාගය දක්වා පාසල් හැරගිය සිසුන් පිළිබඳ නිශ්චිත දත්ත රජය සතු නොවන බවයි. 2018 සිට 2024 දක්වා මෙම සංඛ්යාලේඛන ගණනය කර ඇත්තේ වාර්ෂික පාසල් සංගණන වාර්තා සහ ජාත්යන්තරව පිළිගත් සූත්රයක් භාවිතා කරමිනි.
වසර අනුව පාසල් හැරගිය සිසුන්ගේ දත්ත පහත පරිදි වේ: 2018 වසරේ 38,839ක්, 2019 වසරේ 41,503ක්, 2020 වසරේ 32,540ක්, 2021 වසරේ 25,492ක්, 2022 වසරේ 52,596ක්, 2023 වසරේ 50,345ක් සහ 2024 වසරේ 25,823ක් ලෙස එම සංඛ්යා වාර්තා වේ.
කෙසේ වෙතත්, මෙම සංඛ්යාවලින් ඉවත් වූ සිසුන් සියල්ලෝම අධ්යාපනය සම්පූර්ණයෙන්ම අතහැර දැමූ පිරිසක් නොවන බව අගමැතිනිය අවධාරණය කළාය. මොවුන්ගෙන් ඇතැම් සිසුන් වෙනත් පළාත්වල පාසල්වලට මාරු වී යාම, ජාත්යන්තර පාසල්වලට ඇතුළත් වීම හෝ තම පවුල් සමඟ විදේශගතව අධ්යාපනය ලැබීම සිදුවිය හැකි බව ඇය පැවසුවාය. දත්ත සම්පාදනයේදී භාවිතා කරන ක්රමවේදය හරහා මෙවැනි සිසුන්ව වෙන වෙනම හඳුනා ගැනීමට නොහැකි බවත් ඇය සඳහන් කළාය.
සිසුන් පාසල් හැරයාමට බලපාන ප්රධාන කරුණු ලෙස පෞද්ගලික හේතු, පාසල් ආශ්රිත ගැටලු, පවුල් පසුබිම, සමාජ බලපෑම් සහ වෙනත් අධ්යාපන අවස්ථා කරා යොමු වීම වැනි කරුණු හඳුනාගෙන ඇත.
