ඉන්ධන මිල සංශෝධනය වුවද, පවතින තත්ත්වය හමුවේ ආහාර පානවල මිල ඉහළ නොදැමීමට සමස්ත ලංකා ආපනශාලා හිමියන්ගේ සංගමය තීරණය කර තිබේ. එම සංගමයේ සභාපති හර්ෂණ රුක්ෂාන් මහතා පෙන්වා දෙන්නේ මෙවර ඉන්ධන මිල ඉහළ ගොස් ඇත්තේ රුපියල් 12ත් 15ත් අතර සුළු මුදලකින් බැවින් එහි පිරිවැය පාරිභෝගිකයා මත පැටවීම අසාධාරණ බවයි.
බිත්තර සහ කුකුළු මස් වැනි අත්යවශ්ය ද්රව්යවල මිල ගණන් මේ වන විට යම් මට්ටමකට පහත වැටී තිබීම ද ආහාර මිල ස්ථාවරව පවත්වා ගැනීමට හේතු වී ඇති බව ඔහු සඳහන් කළේය. කෙසේ වෙතත්, ඉදිරියේදී ගෑස් මිල ඉහළ ගියහොත් පමණක් ආහාර මිල ගණන් සම්බන්ධයෙන් නැවත සලකා බැලීමට සිදුවන බව ද සභාපතිවරයා අවධාරණය කළේය.
පසුගිය අප්රේල් මාසයේ විදුලි බිල ඉහළ යාම හේතුවෙන් ෆ්රයිඩ් රයිස් සහ කොත්තු මිල රුපියල් 30කින් ද, තේ සහ කිරි තේ මිල රුපියල් 5කින් ද ඉහළ දැමීමට එම සංගමය පියවර ගෙන තිබුණි. මෙවර මිල ඉහළ නොදමන ලෙස සියලුම ආපනශාලා හිමියන්ගෙන් ඉල්ලා සිටින බවත්, අසාධාරණ ලෙස මිල වැඩි කරන ආපනශාලා වැටලීමට පාරිභෝගික සේවා අධිකාරිය මැදිහත් විය යුතු බවත් ඒ මහතා වැඩිදුරටත් පැවසීය.
