2026 යල කන්නයේ වී අස්වැන්න මිලදී ගැනීම සඳහා කුඩා හා මධ්ය පරිමාණ වී මෝල් හිමියන් සහ සමුපකාර සමිති වෙත සහනදායී පොලී අනුපාතයක් යටතේ ණය ලබා දීමේ විශේෂ වැඩපිළිවෙළක් රජය විසින් ආරම්භ කර තිබේ. මුදල්, ක්රමසම්පාදන සහ ආර්ථික සංවර්ධන අමාත්යාංශයේ සංවර්ධන මූල්ය දෙපාර්තමේන්තුව හරහා මෙය ක්රියාත්මක කෙරේ.
ගොවීන්ට තම අස්වැන්න සඳහා සාධාරණ මිලක් ලැබීම සහතික කිරීම මෙම වැඩපිළිවෙළේ ප්රධාන අරමුණයි.
මෙම ණය යෝජනා ක්රමය යටතේ වාර්ෂිකව 8%ක සහනදායී පොලී අනුපාතයක් යටතේ රුපියල් මිලියන 75ක් දක්වා උපරිම ණය මුදලක් ලබාගැනීමට සුදුසුකම් ලත් පාර්ශ්වයන්ට අවස්ථාව හිමි වේ. ලබාගන්නා ණය මුදල දින 180ක් ඇතුළත ගෙවා නිම කළ යුතුය.
දිනකට වී මෙට්රික් ටොන් 25කට වඩා අඩු ඇඹරුම් ධාරිතාවක් සහිත කුඩා හා මධ්ය පරිමාණ වී මෝල් හිමියන්ට සහ සමුපකාර සමිතිවලට මෙම පහසුකම හිමි වේ. ණය ලබා ගැනීම සඳහා වලංගු ව්යාපාර ලියාපදිංචි සහතිකය සහ වී අලෙවි මණ්ඩලය නිකුත් කරන ලද බලපත්රය ඉදිරිපත් කිරීම අනිවාර්ය වේ.
මෙම ව්යාපෘතිය සඳහා ලංකා බැංකුව, මහජන බැංකුව, ප්රාදේශීය සංවර්ධන බැංකුව, හැටන් නැෂනල් බැංකුව සහ සම්පත් බැංකුව ඇතුළු බැංකු ආයතන 16ක් දායකත්වය ලබා දෙයි. කෘෂිකර්ම දෙපාර්තමේන්තුව විසින් ප්රකාශයට පත් කරනු ලබන සහතික මිලට යටත්ව ගොවීන්ගෙන් වී මිලදී ගැනීම සහතික කිරීමට රජය මෙම පියවර ගෙන ඇත.
