වී නිෂ්පාදන ක්රියාවලියේදී ගොවි ජනතාවට සහන සැලසීම, පොහොර සහනාධාර ලබාදීම, වාරි ජලය කළමනාකරණය සහ වගා හානි සඳහා වන්දි ලබාදීම ඇතුළු කටයුතු වෙනුවෙන් මහා භාණ්ඩාගාරය විසින් රුපියල් මිලියන 46,006ක මුදලක් වෙන් කර ඇති බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ප්රකාශ කළේය.
අමාත්ය මණ්ඩල තීරණ දැනුම්දීම සඳහා ඊයේ (14) රජයේ ප්රවෘත්ති දෙපාර්තමේන්තුවේ පැවති මාධ්ය හමුවේදී ඒ මහතා මේ බව සඳහන් කළේය.
මෙම මුදල් අතුරින් පොහොර සහනාධාරය සඳහා රුපියල් මිලියන 13,492ක් වෙන් කර ඇති අතර, මෙයට පෙර රුපියල් 15,000ක් ලෙස පැවති පොහොර සහනාධාරය මේ වන විට රුපියල් 30,000 දක්වා දෙගුණ කර තිබේ. මීට අමතරව වගා හානි සඳහා වන්දි ලබාදීමට රුපියල් මිලියන 8,886ක්, සුළු වාරිමාර්ග ප්රතිසංස්කරණය සඳහා රුපියල් මිලියන 5,788ක්, සහතික මිලට වී මිලදී ගැනීම සඳහා වී අලෙවි මණ්ඩලයට රුපියල් මිලියන 6,000ක්, පෞද්ගලික අංශය හරහා වී මිලදී ගැනීම සඳහා රුපියල් මිලියන 10,000ක් සහ පෞද්ගලික අංශයෙන් මිලට ගත් වී සඳහා මුදල් පියවීමට රුපියල් මිලියන 1,840ක් ලෙස මෙම මුදල් වෙන් කර ඇත.
මෙම මස 13 වැනිදා සිට වී අලෙවි මණ්ඩලය හරහා වී මිලදී ගැනීම ආරම්භ කර ඇති අතර, වී ගබඩා 148ක් හරහා මෙට්රික් ටොන් 39,500ක් මිලදී ගැනීමට අපේක්ෂා කෙරේ. මෙහිදී නාඩු වී කිලෝවක් රුපියල් 120කටත්, සම්බා කිලෝවක් රුපියල් 130කටත්, කීරි සම්බා කිලෝවක් රුපියල් 140කටත් මිලදී ගනු ලැබේ. වී අලෙවි මණ්ඩලයේ ගබඩා ඉඩකඩ ප්රමාණවත් නොවන අවස්ථාවලදී පෞද්ගලික අංශය සමඟ සම්බන්ධ වී වී මිලදී ගැනීමට පියවර ගන්නා බව ද අමාත්යවරයා පැවසීය. ගොවියා ආරක්ෂා කර ගනිමින් නිෂ්පාදකයාට සාධාරණ මිලක් ලබා දීම රජයේ අපේක්ෂාව බව අමාත්යවරයා වැඩිදුරටත් අවධාරණය කළේය.
