සීනි අන්තර්ගත දියර ආහාර හෙවත් බීම වර්ග සඳහා වර්ණ සංකේත ලේබල් කිරීමේ නියෝග සංශෝධනය කරමින් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා විසින් අතිවිශේෂ ගැසට් නිවේදනයක් නිකුත් කර තිබේ. 1980 අංක 26 දරන ආහාර පනතේ 32 වන වගන්තිය යටතේ නිකුත් කරන ලද මෙම සංශෝධන ජුනි 23 දිනැති අතිවිශේෂ ගැසට් පත්රයේ පළ කර ඇත.
නව සංශෝධනවලට අනුව, බීම වර්ගවල ඇසුරුම් මත ප්රදර්ශනය කළ යුතු රතු, ඇම්බර් සහ කොළ වර්ණ සංකේතවල සැලසුම සහ ප්රදර්ශන ආකාරය පිළිබඳ නව නියමයන් හඳුන්වා දී ඇත. විශේෂයෙන්ම, වීදුරු බෝතල් වැනි ඉඩකඩ සීමිත ඇසුරුම් සඳහා භාවිත කළ හැකි විකල්ප ලාංඡනයක් ද මෙහිදී හඳුන්වා දී තිබීම වැදගත් කරුණකි.
සීනි අන්තර්ගතය මත පදනම්ව වර්ණ සංකේත යෙදිය යුතු ආකාරය පහත පරිදි වේ:
මිලිලීටර් 100ක සීනි ග්රෑම් 8.0කට වඩා අඩංගු බීම සඳහා – රතු වර්ණය.
මිලිලීටර් 100ක සීනි ග්රෑම් 2.5 සිට 8.0 දක්වා අඩංගු බීම සඳහා – ඇම්බර් වර්ණය.
මිලිලීටර් 100ක සීනි ග්රෑම් 2.5ට අඩු බීම සඳහා – කොළ වර්ණය.
එමෙන්ම, මෙම නියෝග මගින් “ව්යාපාරයකින් ව්යාපාරයකට” (Business to Business) සැපයෙන ආහාර නිෂ්පාදන සඳහා නව අර්ථ නිරූපණයක් හඳුන්වා දී තිබේ. ඒ අනුව, සෘජුව පාරිභෝගිකයන්ට අලෙවි නොකරන, වැඩිදුර සැකසුම්, පිළියෙළ කිරීම හෝ නැවත විකිණීම සඳහා පමණක් යොදා ගන්නා ආහාර ද්රව්ය සඳහා මෙම අර්ථ නිරූපණය අදාළ වේ.
මෙම පියවර මගින් ජනතාවට තමන් මිලදී ගන්නා බීම වර්ගවල සීනි අන්තර්ගතය පිළිබඳව වඩාත් පැහැදිලි අවබෝධයක් ලබාදීම සහ මහජන සෞඛ්යය නඟා සිටුවීම රජයේ අපේක්ෂාවයි.
