විනිසුරු විශ්රාම වයස් සීමාව දීර්ඝ කිරීම සඳහා වන 22 වැනි ආණ්ඩුක්රම ව්යවස්ථා සංශෝධන පනත් කෙටුම්පත අභියෝගයට ලක්කරමින් මේ වන විට ශ්රේෂ්ඨාධිකරණයට පෙත්සම් 37ක් ඉදිරිපත් වී තිබේ. අදාළ පනත් කෙටුම්පත අධිකරණ අමාත්ය හර්ෂණ නානායක්කාර මහතා විසින් පසුගිය 18 වැනිදා පාර්ලිමේන්තුවට ඉදිරිපත් කළ අතර, ශ්රී ලංකා නීතිඥ සංගමය ඇතුළු පාර්ශ්ව රැසක් මෙම සංශෝධනයට සිය දැඩි විරෝධය පළ කර ඇත.
පනත් කෙටුම්පත පාර්ලිමේන්තුවට ඉදිරිපත් කළ පළමු දිනයේම එය අභියෝගයට ලක් කරමින් ශ්රේෂ්ඨාධිකරණයට පෙත්සම් 06ක් ඉදිරිපත් වූ අතර, ශ්රී ලංකා නීතිඥ සංගමය, මහාචාර්ය ජී.එල්. පීරිස්, සමගි ජන බලවේගය, සර්ව ජනබලය පක්ෂය සහ නිදහස් නීතිඥ සංගමය ඇතුළු පාර්ශ්ව කිහිපයක් විසින් මෙම පෙත්සම් ගොනු කරනු ලැබීය. ඉන් පාර්ශ්ව කිහිපයක්ම මෙම පෙත්සම් විභාගය සඳහා පූර්ණ විනිසුරු මඩුල්ලක් පත් කරන ලෙස ඉල්ලා සිටීමට කටයුතු කර තිබේ.
ආණ්ඩුක්රම ව්යවස්ථා සංශෝධනයට එරෙහිව ශ්රේෂ්ඨාධිකරණය හමුවේ පෙත්සම් ගොනු කිරීම සඳහා ඉදිරි සති දෙකක කාලයක් පවතින අතර, එම කාලසීමාව අවසානයේ පසුවන සති තුනක කාලයක් තුළ පෙත්සම් පිළිබඳ ශ්රේෂ්ඨාධිකරණයේ මතය කථානායකවරයා වෙත දැනුම් දිය යුතු වේ.
